क्यानाडामा बगिरहेको नदी एक्कासी हराउँदा खैलाबैला !

क्यानाडाको इतिहास र सभ्यतासँग जोडिएको ‘स्लिम्स’ नदीको पानी अकस्मात चार दिनको अवधिमा सुकेपछि वैज्ञानिकहरु अध्ययनका लागि त्यसको मुहानतर्फ गएका छन् । वैज्ञानिकहरुले नदी सुक्नुको प्रारम्भिक कारण जलवायुमा आएको परिवर्तन भएको बताएका छन् । वैज्ञानिकहरुले ‘स्लिम्स’ नदी सुक्नुको कारण जलवायुमा आएको परिवर्तन भएपनि एक्कासि कुनै लक्षणबिना चार दिनभित्र पूरै नदीको पानी हराउनुलाई ‘रिभर पाएरेसी’ अर्थात् ‘नदीको चोरी’ भनेर सम्बोधन गरेका छन् । ‘कास्काबुल्स ग्ल्यासियर’ मुख्य मुहान रहेको करिब १५० मिटर फराकिलो ‘स्लिम्स’ नदी क्यानडामा सयौं वर्षदेखि बहिरहेको थियो । तर, अहिले एकाएक नदी सुकेर एक थोपा पानी पनि नदेखिए पछि त्यहाँका मानिसहरु अचम्मित भएका छन् ।

‘द गार्जियन’को रिपोर्टमा मौसममा आएको परिवर्तनका कारण नदीको मुहान ‘कास्काबुल्स ग्ल्यासियर’मा सबै हिउँहरु पग्लेको र त्यसले नदीको बहाव बढेपछि नदीले आफ्नो धार फेरेको हुन सक्ने बताइएको छ । बिज्ञका अनुसार नदीको बहाव ठूलो भएपछि नदीले स–साना धार बनाउँदै बगेपछि ठूलो नदी एकाएक चार दिनमै हराएको हो । वैज्ञानिकहरुले पुरानो ‘स्लिम्स’ नदी अब ससाना नदी बनेर अलास्काको खाडीतर्फ अघि बढिरहेको बताएका छन् । उनिहरुले नदीको धार परिवर्तन हुन समय लाग्ने बताउँदै जलवायुमा आएको परिवर्तनका कारण एक्कासि नदीले धार परिवर्तन गरेको बताएका हुन् । यसको प्रभाव लाखौं मानिसहरुमा प्रत्यक्ष पर्ने भएकाले त्यस क्षेत्रमा पानीको संकट समाधान गर्ने उपाय खोज्न वैज्ञानिकहरुले क्यानडा सरकारलाई सुझाव दिएका छन् ।