गृहमन्त्रीसँग टकरावमा मेयर बालेन, प्रहरी चौकी हटाउने प्रयास विफल, अश्लील स्टाटसपछि फेरि विवादमा

काठमाडौं महानगरपालिकाका मेयर बालेन्द्र साह र गृहमन्त्री ओमप्रकाश अर्यालबीचको सम्बन्ध हाल चिसिंदै गएको छ। आफ्नो योजनाअनुसार काम नगरेको आरोप लगाउँदै मेयर साहको टिमले गृहमन्त्रीसँग टकराव सुरु गरेको छ, जसको सुरुवात थापाथलीस्थित प्रहरी बिट भत्काउने घटनाबाट भएको हो। शनिबार माइकिङपछि आइतबार कामपा प्रहरी बलले प्रहरी चौकी भत्काउन खोजेको थियो। कानुनविपरीत संरचना हटाउने जिम्मेवारी कामपाको भए पनि सरकारी जग्गामा फोहोर थुपार्दा सरकार मौन रह्यो। हालका ठेक्का फोहोर संकलन केन्द्रहरू पनि सरकारी स्वामित्वमा पर्छन्।

मेयर साहले गुठी संस्थानको जग्गामाथि पटकपटक डोजर चलाउने प्रयास गरे र थापाथलीमा प्रहरीसँग मुठभेट गर्न खोजे। उनले बालुवाटारस्थित प्रधानमन्त्री निवास अगाडिको प्रहरी चौकीसमेत भत्काउने प्रयास गरे, तर जिल्ला प्रशासन कार्यालयको निर्देशनपछि दुई प्रहरी चौकी जोगिए। प्रमुख जिल्ला अधिकारी ईश्वरराज पौडेलको हस्ताक्षर भएको पत्रमार्फत प्रशासनले ट्राफिक कार्यालय तत्काल नहटाउन अनुरोध गरेको थियो, कारणगत आन्दोलनका बेला क्षतिग्रस्त भएको मुख्यालयबाट सय जना प्रहरीलाई सार्न नसकिने उल्लेख गरिएको थियो।

पत्रमा वर्तमान परिस्थितिलाई ध्यानमा राख्दै केही समयका लागि कार्य रोक्न अनुरोध गरिएको र दीर्घकालीन समाधानका लागि गृह मन्त्रालय र प्रहरी प्रधान कार्यालयसँग समन्वय गरिने जनाइएको थियो। प्रशासनको पत्र आए पनि कामपा प्रहरीले भत्काउने प्रयास गरेको थियो, तर ठूलो संख्यामा प्रहरी परिचालन भएपछि कार्य रोकियो। कामपा प्रहरी प्रमुख राजुनाथ पाण्डेका अनुसार हालका लागि दुई प्रहरी चौकी भत्काउने योजना स्थगित गरिएको छ।

मेयर साह र गृहमन्त्री अर्यालबीचको दूरी बढ्नुको कारण इन्जिनियर धीरज जोशीलाई स्वकीय सचिव नियुक्त गर्न मेयर साहले गरेको दबाब पनि हो। उच्च स्रोतका अनुसार गृहमन्त्रीले जबरजस्ती आदेश पालन गर्न अस्वीकार गरेपछि सम्बन्ध बिग्रियो। जेन–जी आन्दोलनका दोषीमाथि कारबाही गर्न नसकेको भन्दै मेयर साहले गृहमन्त्रीको आलोचना गरेका थिए, र उनलाई हटाउन दबाब दिएको खबर पनि सार्वजनिक भयो। प्रधानमन्त्री कार्यालयले कुनै दबाबमा कसैलाई हटाउन नमिल्ने भन्दै विज्ञप्ति जारी गरेको थियो।

यसबीच, मेयर साह आफ्नै फेसबुक स्टाटसका कारण नयाँ विवादमा तानिएका छन्। शनिबार मध्यरातमा उनले अश्लील शब्द प्रयोग गर्दै अमेरिका, चीन, भारत र नेपाली राजनीतिक दलहरू—एमाले, कांग्रेस, राप्रपा, माओवादी केन्द्र र रास्वपालाई गालीगलौज गरेको स्टाटस राखेपछि व्यापक आलोचना भयो। धेरैले उनलाई नशालु पदार्थ सेवनपश्चात स्टाटस लेखेको आरोप लगाए। शुभचिन्तकहरूले ‘दिमाग आउट भयो कि रु’ भनेर कमेन्ट गरेपछि उनले पोस्ट डिलिट गरे। सामाजिक कार्यक्रममा कम देखिने र फेसबुकमा विवादास्पद टिप्पणी गर्ने उनको बानीप्रति असन्तुष्टि बढ्दै गएको छ। अश्लील स्टाटसपछि उनका धेरै समर्थकहरू समेत निराश बनेका छन्।