चिन्ता नलिनुस, होचो हुनुका फाइदा यस्ता छन्

प्रायः होचा मानिसहरु आफ्नो उचाईको बिषयमा सन्तुष्ट रहेको पाइदैन । धेरै मानिस अग्लो हुन नै मन पराउँछन् । मानिसहरुले आफ्नो उचाईबारे गुनासो गरिरहेकै बेला होचो हुनु स्वास्थ्यका लागि फाइदाजनक रहेको एक अध्ययनले देखाएको छ । अमेरिकाको ‘पीएलओएस ओन’मा प्रकाशित एक जर्नलमा प्रकाशित विवरणअनुसार छोटो कदका मानिसको जीवन अग्लो कद भएकाहरु भन्दा लामो हुन्छ । अध्ययनमा ८ सय जापानी र अमेरिकी महिलामा ४० वर्षसम्म अध्ययन गरिएको थियो । अग्लाहरु होचोको तुलनामा बढी रोगी हुने पनि अध्ययनमा देखाइएको छ ।

त्यस्तै क्यान्सर ‘कज एन्ड कन्ट्रोल’ नाम दिएको सन् २०१४ को एक अध्ययनमा अग्ला मानिसलाई क्यान्सर र क्यान्सरजन्य खतरा बढी हुने बताइएको छ । अध्ययनमा क्यान्सरको उपचार गराइ रहेएका ३८ हजार ८ सय ६२ सहभागी थिए । अन्य धेरै अध्ययनले पनि अग्ला महिलामा अन्डासय र स्तन क्यान्सरको खतरा देखाएको थियो । त्यस्तै अग्ला महिलालाई कोलोन, रेक्टम र प्रोस्ट्रेट क्यान्सरको खतरा हुने दाबी अध्ययनमा गरिएको छ । अग्लो व्यक्ति लामो समयसम्म निष्क्रिय बस्यो भने बारम्बार रगत जम्ने समस्या वा रक्तनलीसँग सम्बन्धित अन्य समस्याले पीडित पनि बन्न सक्छ । गत वर्ष ‘जर्नल अफ थ्रोम्बोसिस एन्ड हेमोस्टासिस’मा प्रकाशित एक अध्ययन अनुसार १ सय ९५ सेमी देखि २०० सेमीका मानिसलाई दुई भन्दा बढी पटक रगत जम्ने समस्या देखिएको थियो ।

न्युरोलोजिस्ट डेभिड इगलम्यानका अनुसार होचा मानिसको तुलनामा अग्ला मानिसले संसारलाई अलि ढिलो गतिमा अनुभव गर्छन् । अग्ला मानिसले होचाको तुलनामा १० भागको १ भाग ढिलो आफ्ना आँखा, कान, जिब्रो र छालामार्फत चेतनायुक्त तथ्यांक प्राप्त गर्छन् । अग्लो मानिसको दिमागको स्नायुको मार्ग अलिक लामो भएकोले दिमागले लिने सूचना र संकेतमा पनि ढिलाई हुन्छ ।