जुम्लामा पहिलो पटक मेरुदण्डको सफल अप्रेशन

जुम्ला, १८ जेठ । जुम्लामा मेरूदण्डकाे शल्यकृया (अप्रेसन) भएकाे छ ।

मेरूदण्डकाे शल्यकृया (अप्रेसन) संगै अब  काठमाडाै, सुर्खेत, नेपालगंज धाइरहन नपर्ने भएकाे छ ।

कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा कर्णाली प्रदेशकै पहिलोपटक मेरुदण्डको अप्रेसन गरिएको हाे।

हाडजोर्नी विेशषज्ञ डा देउमन लिम्वुको नेतृत्वमा हाडजोर्नी विशेषज्ञ डा धनबहादुर कार्की, मेडिकल डाइरेक्टर डा पुजन रोकाया, डा मंगल रावल, एनएसथेसियाका डा रमेश भट्टराई, डा निराजन महासेट र डा रविन खापुङको टोलीले मेरुदण्डको पहिलो सफल अप्रेसन गरेको हो ।

टोलीले बनमा बाख्रा चराउन गएको बेला रुखबाट लडेर मेरुदण्डमा समस्या भएका जुम्ला पातारासी गाउँपालिका ५ का ३३ वर्षीया टेकबहादुर बुढाको मेरुदण्डको अप्रेशन गर्न सफल भएकाे हाे  ।  बुढा जेठ ८ गते अस्पताल भर्ना भएका थिए ।

चिकित्सकहरुले मेरुदण्ड भाँचिएको पहिचान भएपछि अप्रेसन गरेर नयाँ जीवन दिएको अनुभूति गर्दै बुढाले भने‘अहिलेसम्म जुम्लामै यो प्रकारको अप्रेशन हुन नसक्नेमा ढुक्क थिए,’ उनले भने, ‘तर विशेषज्ञ चिकित्सकहरुले जुम्लामै यो खालको अप्रेशन संभव तुल्याईदिएर पुर्नजीवन प्रदान गरेका छन्। यसमा निकै खुसी छु।’

पछिल्लो समयमा अस्पतालमा भएको आवश्यक स्रोतसाधन र जनशक्तिका कारण मेरुदण्डको अप्रेसन सम्भव भएको हाडजोर्नी विशेषज्ञ डा धनवहादुर कार्कीले बताए । कार्कीका अनुसार न्युनतम २ देखि ४ लाख रुपैयाँसम्म खर्च लाग्ने शल्यकृया  जुम्ला अस्पतालमा ३० हजार देखि ३५ हजार रुपैयाँमै सम्भव भएको हो । शल्याक्रिया पश्चात् बिरामीको अवस्थामा निकै सुधार भएको  अाफन्तले बताएका छन ।