टिकापुर घटनाको सुनुवाइ आज
सारांश
- काठमाडौं, २ पुस ।
- टिकापुर घटनासम्बन्धी मुद्दाको आज सर्वोच्च अदालतमा सुनुवाइ हुँदैछ ।
- डाँका, चोरी तथा ज्यान मार्ने उद्योग सम्बन्धी मुद्दा दीपकराज जोशी र सपना प्रधान मल्लको संयुक्त इजलासमा परेको छ ।
काठमाडौं, २ पुस । टिकापुर घटनासम्बन्धी मुद्दाको आज सर्वोच्च अदालतमा सुनुवाइ हुँदैछ । डाँका, चोरी तथा ज्यान मार्ने उद्योग सम्बन्धी मुद्दा दीपकराज जोशी र सपना प्रधान मल्लको संयुक्त इजलासमा परेको छ ।
गत साउन ३१ गते यो मुद्दामा अनिलकुमार सिन्हा र प्रकाशसिंह राउतको संयुक्त इजलासले मिसिल झिकाउने आदेश दिएको थियो । कैलालीको टीकापुरमा ७ भदौ २०७२ मा एक नाबालकसहित सात प्रहरीको हत्या भएको मुद्दामा सांसद रेशमलाल चौधरीसहित २६ जनालाई विपक्षी बनाइएको छ ।
मानबहादुर बोहराको जाहेरीमा दर्ता भएको मुद्दाका अभियुक्तहरू सांसद चौधरी डिल्लीबाजरस्थित सदरखोरमा बन्दी जीवन बिताइरहेका छन् । त्यसैगरी आरोपी लक्ष्मण थारुसहित २३ जना जिल्ला कारागार कलालीमा छन् भने दुई नाबालकहरु पोखरास्थित बाल सुधार गृहमा छन् ।
ज्यान मुद्दा लागेकै कारण राजपा सांसद रेशमलाल चौधरीले अहिलेसम्म सपथ ग्रहणसमेत गर्न पाएका छ्रैनन् । राजपाले भने कैलाली घटनालाई राजनीतिक रुपमा हेरिनुपर्ने भन्दै सांसद चौधरीलगायत आरोपीहरुलाई रिहा गर्न माग गर्दै आएको छ । तर, यो मुद्दा अदालतमा विचाराधीन रहेकाले सांसद चौधरीलाई सपथग्रहण गराउन सक्ने अवस्था नरहेको सरकारी पक्षको तर्क रहेको राजपा नेताहरु बताउँछन् ।
प्रतिक्रिया