टिसर्ट (कबिता)
सारांश
- -नवीन प्यासी वर्षौँदेखी व्यस्त पसलको ठिक ढोका सामुन्ने ह्याङ्गरमा झुण्डिएको छ एउटा टिसर्ट ।
- कोही आए ट्राइ गरे साइज मिलेन र फुकालेर त्यहीँ झुण्डाएर गए ।
- कोहि आए, प्राइस ड्याग हेरे, सुमसुम्याए खल्ती छामे र फर्केर हेर्दै गए ।
-नवीन प्यासी
वर्षौँदेखी
व्यस्त पसलको ठिक ढोका सामुन्ने
ह्याङ्गरमा झुण्डिएको छ एउटा टिसर्ट ।
कोही आए ट्राइ गरे
साइज मिलेन र फुकालेर त्यहीँ झुण्डाएर गए ।
कोहि आए, प्राइस ड्याग हेरे, सुमसुम्याए
खल्ती छामे र फर्केर हेर्दै गए ।
कोहि लठ्ठी टेक्दै-टेक्दै आए, परैबाट नियालेर हेरे
केही सम्झिए जस्तो गरे र खोक्दै-खोक्दै गए ।
कोही आए हातमा गुलाफ बोकेर
ओल्टाइल्टाइ गरे र कलर मन परेन भनेर गए ।
कोहि आए, मन पराए
मुल्यमा सम्झौता हुन सकेन र त्यहीँ छाडेर गए ।
वर्षौँदेखी
व्यस्त पसलको ठिक ढोका सामुन्ने
ह्याङ्गरमा खुण्डिएको छ एउटा टिसर्ट ।
ऊ बारबार कुचीले धुलो टक्टकाइरहन्छ
मानौँ, ऊ ऐना हेर्न बिर्सिगएको युवती हो ।
घरिघरि बतासका मिठो स्पर्शहरुसँग तर्सिन्छ
मानौँ, ऊ कसैले छोडिगएको अधुरो प्रेम हो।
कहिलेकाही कलिलो घाम टुप्लुक्क आइदिन्छ
र गिज्याएर गइदिन्छ
मानौँ, ऊ बाह्रखरी पढिरहेको वृद्ध मानिस हो ।
तीनपटक घटिसक्यो उसको -बिक्री मुल्य ।
वर्षौँदेखी
व्यस्त पसलको ठिक ढोका सामुन्ने
ह्याङ्गरमा झुन्डिएको छ एउटा टिसर्ट ।
उसँग रहरहरुको बगैँचा नै थियो-
कसैको जिउमा सजिएर नजरहरुबाट सताइमाग्ने
कसैको जिउमा सजिएर प्रशंसाको तलाउमा चुर्लुम्म डुब्ने
कसैको जिउमा सजिएर पत्रिकाहरुको फ्रन्ट पेजमा देखिने ।
ती सब रहरहरुले क्रमश: आत्महत्या गरिसके ।
वर्षौँदेखी
व्यस्त पसलको ठिक ढोका सामुन्ने
ह्याङ्गरमा झुन्डिएको छ एउटा टिसर्ट ।
झुण्डिरहेछ ऊ
मानचित्रबाट गायब देशको नागरिकता झैँ झुण्डिरहेछ ।
उसलाई थाहा छ
ऊ बिक्री हुन नसक्ने पसलभरिकै पुरानो र अन्तिम पिस हो ।
(Tramadol)
सम्बन्धित खबर
तपाईंले छुटाउनुभयो कि?
प्रतिक्रिया