त्रास देखाएर उठेका ‘डन’ हरू अल्पायुमै लास बनेर सक्किन्छन !

काठमाडौं, १२ वैशाख । डन ! आम साधारण यस्तो शव्द सुन्नासाथ त्रसित हुन्छन् । कुनै न कुनै रूपमा अपराध कर्मसँग जोडिने व्यक्तिलाई नेपालमा डन भनेर चिन्ने गरिन्छ । नेपाल प्रहरीको भाषामा यी ‘गुन्डा’ हुन् । चुल्ठे मुन्द्रे र तस्कर हुन् ।

राजनीतिक आडमा अपराध कर्मलाई बलियो बनाउँदै ठूला ठेक्कापट्टामा लगानी गरी अकुत सम्पत्ति भित्राउने, क्यासिनो, मिटरव्याजमा लगानी गरी एकको चार गुणा हिसाबकिताब लिनेलाई पनि डन भन्ने गरिएको छ ।

यस्ता डनको आयु कति हुन्छ ?

चार वर्षको आँडकलाई हेर्ने हो भने त्रास देखाएर सम्पत्ति आर्जन गरी युवाहरूको झुन्ड बोक्ने गुन्डाहरूको आयु लामो देखिँदैन । अपराध कर्म गरेर सर्वसाधारण, व्यापारी र कहिलेकाहीँ राजनीतिज्ञसम्मलाई दिक्क लगाउने गुन्डाहरू सामान्य अवस्थामा मारिएका छन् ।

युवा संघ रूपन्देहीका अध्यक्ष दुर्गा तिवारीको हत्या गरेपछि एकाएक चर्चामा आएका ‘डन’ मनोज पुनः लामो समयसम्म बाँच्न सकेनन् । प्रहरीले उनलाई खोजेर गोली ठोक्यो । डिएसपी कुमोद ढुंगेलको टोलीले पुनलाई इन्काउन्टरमा मारेको थियो । सहयोगी सोम आलेसहित देखिएका पुनको अपराध कनेक्सन तिवारीसँगै बुटवलका व्यापारी र निर्माण व्यावसायी संघका अध्यक्ष शरद गौचन हत्यासम्म जोडिएको थियो ।

तीन वर्ष अघि काठमाडौंको भिमढुङ्गामा डन दिनेश अधिकारी ‘चरी’को इन्काउन्टर टिममा पनि ढुंगेल थिए । एमाले धादिङका सदस्य समेत रहेका अधिकारीले विभिन्न व्यक्तिलाई धम्क्याउन थालेपछि उनलाई मारियो ।

२१ साउन, २०७१ मा चरीको इन्काउन्टर भयो । यो इन्काउन्टरसँग मोडल खुश्वु ओली र नेकपा एमालेका विभिन्न नेताहरूको कनेक्शन पनि जोडिएको थियो ।

३ भदौ, २०७३ मा मारिए अर्का नामुद डन कुमार श्रेष्ठ ‘घैंटे’ । काठमाडौंको सामाखुसीमा प्रहरीको गोली लागेर घाइते भएका उनको शिक्षण अस्पताल महाराजगञ्जमा मृत्यु भयो । कपुरधारा व्रिटिश क्याप पछाडि सादा पोशाकमा रहेका प्रहरी र घैंटेको समुहबीच केहीबेर भिडन्त भएको थियो ।

सामाखुसीमा महानगरीय प्रहरी अपराध महाशाखाको सर्च अभियानका क्रममा घैंटेको टोलीले फायर खोलेपछि प्रहरीले जवाफी कारवाही गरेको बताइयो । अहिलेका प्रहरी प्रमुख सर्वेन्द्र खनाल महाशाखा प्रमुख भएका बेला घैंटे इन्काउन्टरमा मारिए । सामाखुसी लगायतका क्षेत्रमा चन्दा असुल्ने लगायतका गतिविधिमा संलग्न भएको, भूकम्प पीडितलाई सहयोग गर्ने भनेर राहत उठाएर आफूले खर्च गर्ने गरेको अनुसन्धानबाट खुलेको प्रहरीले जनाएको थियो ।

घैंटेसँग कांग्रेसका नेताहरूको कनेक्शन थियो । जगदिरश्वर नरसिंह केसी र नेता गगन थापाको नाम घैंटेसँग जोडिएर आयो । राजनीतिक नेतृत्वसँग बारम्बार नाम जोडिए पनि यस्ता व्यक्ति त्रास देखाएर उठेका हुन्छन् । एक प्रहरी अधिकारी भन्छन्,‘पापको भाँडो पनि लामो समयसम्म टिक्दैन भन्ने धार्मिक भनाइका उदाहरण हुन् मारिएका गुन्डाहरू । मारिएपछि भावुक कुरा गर्नेहरूले कति त्रास खेपेका थिए भन्ने प्रहरीमा परेको उजुरीले देखाउँछ ।’

मारिनबाट जोगिए र जो जेलको हावा खाँदैछन्

नेपालमा डनगिरी दुइटा समुहमा केन्द्रीत थियो । राजिव गुरूङ (दिपक मनाङे) र मिलन गुरूङ (चक्रे मिलन) । यहि समुहका विभिन्न हाँगाविगाबाट फस्टाएकाहरू थिए अन्य ।

केही साता अघिमात्र मनाङको प्रदेश सभामा निर्वाचित भएका डन दिपक मनाङेलाई पुरानो मुद्दाका आधारमा अदालतले जेल पठाएको छ । प्रहरीले पक्राउ गरी उनलाई डिल्लिबजार कारागार पठाइसकेको छ ।

त्यसअघि इन्काउन्टर नै गर्न खोजिएका डन गणेश लामालाई हात हतियार खरखजाना मुद्दा लगाएर जेल पठाइयो । इन्काउन्टरको तयारी गरिए पनि अनुकुलता नमिल्दा भारतबाट पक्राउ गरी नेपाल झिकाइएका रमेश बाहुन पनि जेलमा छन् ।

निर्माण व्यावसायी शरद गौचनको हत्या अभियोगमा काभ्रेली समुहका समिरमान बस्नेतलाई पनि जेल पठाइएको छ । समाजमा त्रास फैलाउने काममा सक्रिय रहेका कारण जेल पठाइएका यी डनहरूलाई प्रहरीले अहम् मौकामा इन्काउन्टर गर्ने तयारी नगरेको होइन । तर अनुकुलता नमिलेका कारण पक्राउ गरी जेल पठाइएको बताइन्छ ।

दैनीक नेपाल बाट ।