देशभर चिसो बढेसंगै लाग्न थाल्यो आगो र घाम प्यारो

काठमाडौं, कार्तिक १४ । मनसुन बाहिरिएर शरद ऋतुको आगमनसँगै देशभर विस्तारै चिसो बढ्न थालेको छ । विशेष गरी रातको समयमा चिसो बढ्न थालेको अनुुभव गर्न थालिएको छ ।

यस वर्ष हिउँदमास सुरु नहुँदै जुम्लामा शून्यभन्दा तल न्यूनतम तापक्रम पुगेको छ । काठमाडौँसहित अन्यत्र केही जिल्लामा ११ डिग्री आसपास न्यूनतम तापक्रम रेकर्ड भएको छ ।

पोष्ट मनसुनको अवधि मानिने असोज, कात्तिक र मङ्सिरको आधाआधीको समय आकाश खुलेर सफा हुने समय हो । तथापि जाडो निम्त्याउँदै मौसमलाई चिसोतिर धकेल्ने पश्चिमी वायुको गति बढाउने समय पनि यही हो । यद्यपि अहिल्यै जाडो आइसकेको भने होइन ।

चिसो बढेसंगै दिउँसो घाम राम्ररी लागे पनि चिसो हावाको मन्द चाप बढ्दै गरेको महसुस काठमाडौँका बासिन्दाले गरेका छन् । गएरातिदेखि काठमाडौंको न्यूनतम तापक्रम अरू दिनभन्दा तल झरेर ११.४ डिग्री सेन्टिग्रेट र अधिकतमतर्फ भने २६ डिग्री सेन्टिग्रेट कायम रहेको छ ।

अबको केही दिन सुक्खा मौसम नै रहने र वर्षाको सम्भावना नरहेको मौसमविदहरुले बताएका छन् ।पश्चिमी वायुको प्रभाव बढ्दै जाँदा जाडो महिना सुरु हुनुअघि देशभर हल्का वर्षा हुने सम्भावनासमेत रहेको जनाइएको छ ।