नवनियुक्त प्रधानन्यायाधीश जबराले सपथ लिए

काठमाडौं। नवनियुक्त प्रधानन्यायाधिश चोलेन्द्रशमशेर जबराले पद तथा गोपनीयताको सपथ लिएका छन्।
राष्ट्रपति विद्या भण्डारीले शितल निवासमा बुधबार बिहान एक समारोहका बीच नवनियुक्त प्रधानन्यायाधिश जबरालाई पद तथा गोपनियताको सपथ खुवाइकी हुन्। मंगलबार संसदीय सुनुवाई विशेष समितिले जबरालाई प्रधानन्यायाधिशमा सर्वसम्मत अनुमोदन गरेको थियो।
सपथग्रहण समारोहमा उपराष्ट्रपति नन्दबहादुर पुन, प्रधानमन्त्री केपी शर्मा ओली, प्रतिनिधिसभाका सभामुख कृष्णबहादुर महरा, प्रतिनिधिसभामा प्रमुख प्रतिपक्ष दलका नेता एवम् पूर्व प्रधानमन्त्री शेरबहादुर देउवा, मन्त्रीहरु, संवैधानिक अंगका प्रमुखहरु, नेपाल सरकारका उच्च पदस्थ कर्मचारीहरुको सहभागिता रहेको थियो।
२०१४ साल मंसीर २८ गते काठमाडौंमा जन्मनु भएका नवनियुक्त प्रधानन्यायाधिश जबराले २०३६ सालदेखि कानुन व्यवसायमा प्रवेश गरेका थिए। २०५२ सालसम्म कानुन व्यवसायमा संलग्न उहाँ त्यसपछि पुनरावेदन अदालतको अतिरिक्त न्यायाधिशमा नियुक्त भएका थिए। पुनरावेदन अदालतमा रहँदा ४ हजार ५ सय मुद्दा फैसला गर्नु भएका नवनियुक्त प्रधानन्यायाधिश जबराले २०७१ साल जेठ १३ गते सर्वोच्च अदालतमा न्यायाधीश भएका थिए।