निर्मला पन्त हत्या प्रकरण:आरोपित विष्टलाई काठमाडौं ल्याइयाे

उनको मानसिक अवस्थाका विषयमा चेकजाँच हुन थालेको हो।‘उनको मानसिक र शारीरिक स्वास्थ्य जाँचका लागि काठमाडौं पठाएका हौं’, कञ्चनपुरका एसपी कुबेर कडायतले नेपालखबरसँग भने, ‘बिहान गएका हुन। पुगिसके होलान।’ साउन १० गते साथीकोबाट घर फर्कदै गर्दा बेपत्ता भएकी निर्मलाको साउन ११ गते कञ्चनपुरको उल्टाखाम उखुबारीमा शब फेला परेको थियो। अनुसन्धानमा उनको बलात्कारपछि हत्या भएको खुलेको थियो।

कञ्चनपुर प्रहरी र काठमाडौंबाट गएको केन्द्रीय अनुसन्धान ब्युरोको अनुसन्धानमा निर्मलाको बलात्कार र हत्यामा बिष्टको संलग्नता रहेको निष्कर्ष निकालेको थियो।तर, प्रहरी अनुसन्धानमा स्थानीयले असन्तुष्टि जनाएपछि आन्दोलन चर्किएको थियो। गृहमन्त्रालयले सहसचिव हरिप्रसाद मैनालीको नेतृत्वमा अनुसन्धान टोली खटाएको छ।प्रहरी अनुसन्धानमा बिष्टले २०६५ मा आफ्ना कान्छा भिनाजु नारायणसिंह बिष्टको हत्या गरेको खुलेको थियो। उनी चालचलन राम्रो भएको कारागारको सिफारिशमा २०७४ जेठमा रिहा भएका थिए। तर स्थानीयको दाबी अनुसार बिष्ट मानसिक अवस्था ठीक नभएका ब्यक्ति हुन्। प्रहरीले मुख्य अभियुक्त बचाउन उनलाई उभ्याएको आरोप स्थानीयले लगाएका छन्।

प्रहरी अनुसन्धानमा साउन १० गते कञ्चनपुरको भीमदत्त नगरपालिका—१८मा रहेकी साथी रोशनी वमको घरमा बिहान सवा ११ बजे विज्ञान विषयको उत्तरपुस्तिका लिन गएकी थिइन्। उनको साइकलको चेन फुस्किरहन्थ्यो। घटनाका दिन पनि साइकलको चेन फुस्किएको थियो।
रोशनीको घरमा पुगेपछि उनले हात धोइन्। त्यसपछि दुबै साथी करिब दुईघण्टा त्यहाँ बसे। त्यसपछि निर्मला रोशनीको घरबाट नोटकपी, अम्बा र रोशनीले दिएको २० रुपैयाँ लिएर फर्किएकी थिइन्।

प्रहरी अनुसन्धानमा घर फर्कदै गर्दा बाटोमा बिष्टसँग निर्मलाको भेट भएको थियो। निर्मला साइकलको चेन बनाउँदै थिइन्। बिष्टले सहयोग गरे। ‘युवतीहरु देखेपछि बिष्टले सन्तुलन गुमाएका हुन सक्छन्। त्यसपछि नजिकैको उखुबारीमा लगेर घटना भएको हो’, अनुसन्धान निष्कर्ष थियो।