पशुपतिमा धर्मशाला- दुई देशलाई जोड्ने पुल : प्रम ओली
सारांश
- काठमाडौँ ।
- प्रधानमन्त्री केपी शर्मा ओलीले नेपाल–भारतमैत्री पशुपतिनाथ धर्मशाला दुई देशलाई जोड्ने पुल भएको बताएका छन् ।
- प्रधानमन्त्री ओली र भारतीय समकक्षी नरेन्द्र मोदीले शुक्रबार साँझ संयुक्तरुपमा धर्मशालाको उद्घाटन गरे ।
काठमाडौँ । प्रधानमन्त्री केपी शर्मा ओलीले नेपाल–भारतमैत्री पशुपतिनाथ धर्मशाला दुई देशलाई जोड्ने पुल भएको बताएका छन् । प्रधानमन्त्री ओली र भारतीय समकक्षी नरेन्द्र मोदीले शुक्रबार साँझ संयुक्तरुपमा धर्मशालाको उद्घाटन गरे ।
भारत सरकारको सहयोगमा बनेको धर्मशालाको उद्घाटन कार्यक्रममा बोल्दै प्रधानमन्त्री ओलीले दुई देशबीचको धार्मिक, सांस्कृतिक एवं ऐतिहासिक सम्बन्धलाई अझ प्रगाढ बनाउनमा धर्मशाला महत्वपूर्ण हुने विश्वास व्यक्त गरे ।
प्रधानमन्त्री ओलीले भने, “पशुपतिनाथलाई देखिने र बुझ्ने गरी पवित्र धार्मिक स्थलका रुपमा विकास गर्नुपर्छ, स्नान गर्न सकिने गरी वागमतीलाई सफा बनाइनुपर्छ । ज्ञान, दर्शन र सभ्यताको उद्गमस्थल भएकाले पनि यस क्षेत्रको विकासमा विशेष ध्यान दिनुपर्छ । अब यसको पुनर्जागरण गर्नुपर्छ ।” समृद्ध नेपाल र सुखी नेपालीको अभियान पूर्वीय दर्शनको ‘सर्वे भवन्तु सुखिनः’ को भावनाअनुसार नै गर्न लागिएको बताए ।
कार्यक्रममा भारतीय प्रधानमन्त्री मोदीले धर्मशाला दुई देशका जनता जनताबीच सम्बन्ध बढाउने माध्यम बन्ने विश्वास व्यक्त गरे । “विश्वमा शिवभक्त जीवनमा एक पटक पशुपतिनाथको दर्शन गर्न चाहन्छन्, मुक्तिनाथ, पशुपतिनाथ, जनकपुर र लुम्बिनीले नेपालको विविधतामा एकता ल्याई प्रतिनिधित्व गर्छ, धर्मशालाले धार्मिक पर्यटन प्रवद्र्धन गर्न सहयोग गर्नेछ”, मोदीले भने ।
प्रतिक्रिया