पूर्खाले ज्यान दिएर बचाएको देश हामी अडानमा बसे पुग्छ : प्रम ओली

काठमाडौं । प्रधानमन्त्री केपी शर्मा ओलीले हाम्रा पूर्खाहरुले ज्यान दिएर देश बचाएकाले हामी अडानमा बसेमात्र पुग्ने बताएका छन् ।

काजी कालु पाण्डेको समाधीस्थल पुगेर प्रधानमन्त्री ओलीले नेपालीको लागि तीर्थस्थल भएको बताएका छन् । “हाम्रा पूर्खाहरुले ज्यान दिएर देश बचाए हामीले ज्यान दिनु पर्दैन अडानमा बसे मात्र पुग्छ” प्रधानमन्त्री ओलीले भने, “राष्ट्रको पहिचानको निम्ति राष्ट्रको रक्षाका निम्ति एकीकरण भएको थियो । यसलाई जोगाउन हामीमा एकता चाहिन्छ ।”

काजी कालु पाण्डेको समाधीस्थलमा दहचोकमा आयोजित तेस्रो इन्द्रदह पर्यटन महोत्सवको उद्घाटन गर्दै प्रधानमन्त्री ओलीले पाण्डेको पूर्णकदको सालिक अनावरण, श्रद्धान्जली ब्यक्त गर्ने गरेका छन् ।

चन्द्रागिरी नगरपालिका रहेको ठाउँमा प्रधानमन्त्री ओलीले गतवर्ष पाँचतले भ्यूटावर शिलान्यास गरेका छन् । टावरको दुई तला निर्माण भइसकेको छ ।

प्रधानमन्त्री ओलीले दहचोकलाई पर्यटकीय क्षेत्रको रुपमा विकास गर्नुपर्ने बताएका छन् । नेपाल एकीकरणका एकजना सारथी पाण्डेले ४४ बर्षको उमेरमा देशका लागि जीवन आहुती दिएर असाधरण योगदान गरेको प्रधानमन्त्री ओलीले बताए ।