पोखरा निर्विवाद प्रदेश राजधानी- अखण्ड र एकीकृत बनाउने उद्घोष

काठमाडौं, २३ माघ – पोखरा प्रदेश राजधानीका रुपमा निर्विवाद सहर हो । सोही सहरमा सोमबार बसेको पहिलो प्रदेशसभा बैठकमा प्रदेशसभा सदस्यले पर्यटकीय क्षेत्रका रुपमा समेत कहलिएको मुकाम पोखरासहित सिंगै प्रदेशलाई समृद्ध र सुन्दर बनाउने अठोट गरे । प्रदेशलाई समृद्ध र सुन्दर बनाउने आधार पनि आफूहरुसँग रहेको उनीहरुले बताए । यो खबर आजको नागरिक दैनिकमा छापिएको छ ।

प्रदेशलाई अखण्ड र एकीकृत बनाउने उद्घोषका साथ सदस्यहरुले मुलुककै सुन्दर सहर बनाउने वाचा गरे । प्रदेशभित्रका बासिन्दाको मुहार फेर्ने योजना सुनाउँदै सदस्यहरुले त्यसका लागि दलहरुबीच सहकार्यको प्रतिबद्धता पनि जनाए । एमाले केन्द्रीय सचिवसमेत रहेका प्रदेशसभा सदस्य पृथ्वीसुब्बा गुरुङले प्रदेश ४ लाई गौरवपूर्ण बनाउने उद्घोष गरे । प्राकृतिक स्रोत, साधन, ऊर्जा, पर्यटन, संस्कृति र प्रकृतिका हिसाबले प्रदेश उत्कृष्ट रहेको उनीहरुको भनाइ थियो ।

‘आगामी १० वर्षभित्र ३ हजारदेखि ५ हजार मेगावाट विद्युत् यही प्रदेशबाट उत्पादन गरेर प्रदेशलाई नै समृद्धिको बाटोमा लैजान्छौं,’ गुरुङले भने, ‘यो प्रदेशमा १५ प्रतिशत जनता अझै बिजुलीविहीन अवस्थामा छन् । उनीहरुलाई ५ वर्षभित्र विद्युत्को उज्यालोमा समेट्छौं ।’ गुरुङले उत्तरी नाका कोरला (मुस्ताङ) देखि दक्षिणको सुस्ता (नवलपरासी) लाई सडकले जोडेर व्यापारको ढोका खोल्ने पनि बताए । ‘अब हामीले प्रदेशलाई आर्थिक रुपमा उन्नतितर्फ उन्मुख बनाउनेछौं ।

सबैभन्दा सुन्दर, सचेत र शान्त प्रदेश बनाउन चाहेका छौं,’ गुरुङले भने, ‘अरु ६ वटा प्रदेशभन्दा कुनै रुपमा पनि कमजोर हुन दिनेछैनौं ।’ प्रदेशका १४ प्रतिशत जनता अझै पनि गरिबीको रेखामुनि रहेको बताउँदै उनले आगामी ५ वर्षभित्र गरिबी दर घटाउने प्रतिबद्धता व्यक्त गरे । प्रदेश कला, संस्कृति, साहित्य र पर्यटनको राजधानी भएकाले समृद्ध बन्ने आधार रहेको उनको भनाइ थियो । पोखरामा बन्ने विमानस्थलले अन्तर्राष्ट्रिय सहर जोड्न सघाउने भएकाले पनि समृद्ध बन्न सहयोग पुग्ने विश्वास उनले व्यक्त गरे । प्रदेशभित्र अझै सुविधासम्पन्न अस्पताल, पोखरामा अन्तर्राष्ट्रिय स्तरको सभाहल, अन्तर्राष्ट्रिय स्तरको रंगशाला बनाउने योजना उनले सुनाए ।

यस्तै कांग्रेसका कृष्णचन्द्र नेपालीले भारत र चीन जोड्ने कालीगण्डकी करिडोर, काठमाडौं–पोखरा–लुम्बिनी जोड्ने सडक, विमानस्थल, सुरुङमार्ग, द्रुतगतिको सडक निर्माणले प्रदेश समृद्ध बन्ने बताए । ‘छोटो समयमा आर्थिक रुपमा समृद्ध र सुन्दर बनाउन सकिने प्रदेश हो,’ उनले भने, ‘प्रकृति र पर्यटनले साथ दिएको छ । समृद्ध र समुन्नत सहर बनाउन विधिको शासन चाहिन्छ ।’ उनले जनतामैत्री सेवा, विधिको शासन स्थापना र भ्रष्टाचार निर्मूल गर्न आफूहरु लाग्ने वाचा  गरे ।

माओवादी केन्द्रका हरिबहादुर चुमानले स्थानीय तहलाई दिएको अधिकार व्यवस्थित रुपमा कार्यान्वयन गर्न सघाउने बताए । ‘अहिले स्थानीय तहको अधिकार कटौती गर्ने प्रयास भइरहेको छ । प्रदेशसभाले त्यसका विरुद्ध खबरदारी गर्नुपर्छ,’ चुमानले भने । उनले प्रदेश ४ मा सबैभन्दा बढी अवसर रहेकाले त्यसबाट फाइदा लिनुपर्ने बताए । ‘पर्यटन, जलस्रोत र उद्योगमा यो प्रदेशले सिंगो मुलुकको नेतृत्व गर्नुपर्छ,’ उनले भने, ‘शिक्षा र स्वास्थ्यको केन्द्रका रुपमा पनि यसले विकास गर्न सक्छ । त्यसमा हामी सबैको हातेमालो चाहिन्छ ।’ स्थिरता, सुशासन र आर्थिक समृद्धिको जनादेश आफूहरुले पाएकाले त्यसका लागि पहल गर्ने चुमानले बताए ।

राष्ट्रिय जनमोर्चाका सदस्य कृष्ण थापाले प्रदेशसँग ठूलो आयआर्जन गर्न सक्ने क्षमता रहेको बताए । उनले प्रदेशलाई समृद्ध बनाउने र जनताका समस्या समाधान गर्ने बताए । उनले संघीयतामा असहमति जनाउँदै अहिलेको अवस्थामा जनताको जीवनस्तर उकास्न अप्ठेरो पर्ने बताए । उनले सबैभन्दा पहिला राजनीतिक भ्रष्टाचार निर्मूल गर्नुपर्नेमा जोड दिए । नयाँशक्तिका हरिशरण आचार्यले साझा अजेन्डा लिएर अघि बढ्नुपर्ने बताए । उनले प्रदेशलाई समृद्ध बनाउन हरदम प्रयास गर्ने वाचा गरे ।