प्रचण्डको अभिव्यक्तिप्रति एमाले नेताको आपत्ति

काठमाडौं, पुस ९ । माओवादी अध्यक्ष प्रचण्डले आलोपालो प्रधानमन्त्री बन्ने सहमति भएको भनेर दिएको अभिव्यक्तिप्रति एमाले नेता केशब बडालले आपत्ति जनाएका छन् । नेपाली रेडियो नेटवर्कको कार्यक्रम नेपाली बहसमा ऋषि धमलासँग कुरा गर्दै नेता बडालले आलोपालो प्रधानमन्त्रीको कुरा गरेर प्रचण्डले गल्ती गरेको बताए ।

स्थायीत्वका लाग वाम गठबन्धनले जनतालाई आश्वासन दिएको स्मरण गराउँदै बडालले ५ वर्षका लागि एउटै व्यक्ति प्रधानमन्त्री बन्नुपर्नेमा जोड दिए । अढाइ वर्ष फलाना, अढाइ वर्ष फलाना भनेर गयो भने जनताप्रति विश्वासघात हुने तर्क बडालको छ ।

आलोपालो प्रणालीमा जानु भनेको स्थिर सरकारको अवधारणाविपरित हुने बडालको तर्क छ ।

सार्वजनिक रुपमा भागबण्डाको कुरा गर्दा एकता प्रक्रियालाई बल नपुग्ने उनको भनाई थियो । बडालले भने, ‘भागबण्डाकै मात्र कुरा गर्ने हो भने त्यसलाई पार्टी एकता मान्न सकिँदैन् ।’

एमालेसँग पार्टी एकता गर्ने विषयमा आफूहरुमा अठोट भएको उनले बताए । पार्टी एकता प्रक्रियाका क्रममा विमति र बहस हुनु सामान्य भएको उनले बताए ।

पार्टी एकताका लागि नै चुनावमा साझा घोषणा लिएर जनतामाझ गएको बताउँदै बडालले सैद्धान्तिक रुपमा कुनै विवाद नभएको जिकिर गरे । पार्टी अध्यक्ष र प्रधानमन्त्री को बन्ने भन्ने विषयमा निश्कर्षमा नपुगिएको बडालले बताए ।