प्रचण्ड भन्छन्ः हिजो ह्रस्व-दीर्घमा पनि लड्यौँ, अब ड्याम्मै सरप्राइज दिन्छौँ

काठमाडौँः नेकपा माओवादी केन्द्रका अध्यक्ष पुष्पकमल दाहाल प्रचण्डले जनतालाई सरप्राइज दिने गरी एमाले–माओवादी एकता हुने बताएका छन् ।

कम्युनिस्ट पार्टी स्थापना दिवसको अवसरमा राजधानीमा आयोजित कार्यक्रममा बोल्दै अध्यक्ष दाहालले वाम एकताले दिएको सरप्राइज जस्तै एकता पनि ड्याम्मै हुने दाबी गरे ।

‘वाम तालमेल, साझा घोषणा पत्रसहितका हाम्रा कामबाट कयौँले सरप्राइज भयो भने । वैशाख ९ गते एकता हुन्छ भन्यौँ, वैशाख ९ मा गर्दा राम्रो हुन्छ भन्ने थियो, एकता संयोजन समितिले स्वीकारेको थियो । तर निर्णय भइसकेको थिएन’, उनले भने, ‘तर निर्णय नै गरिसकेको भनेर हल्ला गरियो । ओलीजीसँग सकारात्मक छलफल हुँदा पनि अनेकन हल्ला गरियो । तर अब एकता हुन्छ हुन्छ ।’

अध्यक्ष दाहालले एकता भाँड्न धेरै तागत, विचार प्रवृत्ति सक्रिय भइरहेको पनि उल्लेख गरे । ‘वैशाख ९ मा भएन, ओलीजी र मैले त्यो दिन गर्छौँ भनेर मिति तोक्यो भने हुँदैन, एकता हुन्छ भनेको दिन हुँदैन’, प्रचण्डले भने, ‘हामीबीच ड्याम्मै एकता हुन्छ र गर्नु पनि पर्छ । तर घोषणा गरेको मितिमा हुँदैन ।’

नेपालका कम्युनिस्टहरु हिजो स–साना कुरामा झगडा गरेको पनि दाहालले बताए । ‘ह्रस्व र दीर्घमा, फुल स्टप र कमामा हामीले झगडा गरेका थियौँ’, उनले भने, ‘तर हामी फेरि इतिहासबाट शिक्षा लिएर अघि जानुपर्छ । हिजो झगडा गरेका हामी आज यो बिन्दुमा आएर एकता नजिक पुगिसकेका छौँ ।’

पार्टी एकता ठुलो कुरा भएको बताउँदै दाहालले देश विदेशको पनि यसैमा ध्यान रहेको बताए । ‘एकताबारे माओवादी र एमालेका नेताहरुले भन्दै नभनेका कुरा पनि भने भनेर आउँछ । आज पनि राम्रो भयो भनेर कार्यालय बैठकमा भनेँ तर अर्कै कुरा आयो’, दाहालले गुनासो गरे, ‘माओवादीलाई पनि उचालिएको छ । एमालेलाई पनि उचालिएको छ । मेरो र ओलीजी दुवैको कान भर्नेहरु सक्रिय भएका छन् ।’

जनताले पछारिदिए

अध्यक्ष दाहालले ठुलो पार्टी हुँदाको अनुभूति पनि आफूहरुसँग रहेको बताउँदै जनताले पछारेपछिको अनुभव पनि बटुलिसकेको भन्दै ठट्यौली गरे । ‘साह्रै ठुलो हुनु पनि नहुने रहेछ, धर्ती छोडिँदो रहेछ अनि जनताले पछारिदिएपछि थाहा हुँदो रहेछ वास्तविकता’, प्रचण्डले भने, ‘पार्टी एकताका लागि हामीले एकअर्कालाई सम्मान गर्नैपर्छ । हामी अहिले सत्तामा छौँ, प्रतिपक्षमा पनि विकास र समृद्धिमा सहकार्य हुन्छ ।’

दुई पार्टीबीच एकता गरेर देशको आवश्यकतालाई सम्बोधन गर्न सनुपर्ने उनले बताए । ‘एमालेका देशभरीका कार्यकर्ताले पनि नेतालाई उल्टो पाल्टो लाउनु भएन । माओवादीका साथीहरुले पनिज मेरो कान भर्ने भयो भने असर पर्दैन म भन्दिनँ । सबैले सकारात्मक दिशाका लागि सुझाव दिनुपर्यो’, उनले भने, ‘मदन भण्डारी जीवित हुँदै पनि दुई पार्टीबीच एकताको कुरा अघि बढेको थियो । माधव नेपाल एमाले महासचिव हुँदा पनि एकता अघि बढेको थियो तर टुंगो लागेन । यो पटक एकता हुन्छ तर जुन दिन  हुन्छ, ड्याम्मै हुन्छ ।’