प्रदेशको राजधानी माग्दै दाङमा भोलि उल्टो शंख बजाउने तयारी

काठमाडौं, ८ माघ । आमहडताल र बन्द कार्यक्रम फिर्ता गरी दाङमा राजधानीको लागि फरक आन्दोलन हुने भएको छ । बन्दले सर्वसाधारण नागरिकलाई दुःख भएको महसुस गर्दै बन्द कार्यक्रम फिर्ता गरिएको थियो ।

राजनीतिक दलहरुको संयुक्त संघर्ष समितिको बैठकले दाङ राजधानी हुनुपर्ने मागसहित विभिन्न कार्यक्रमहरु गर्ने निर्णय गरेको छ । जसअनुसार रुपन्देहीलाई प्रदेशको अस्थायी राजधानी बनाउने मन्त्रिपरिषद्को निर्णयविरुद्ध माघ ९ गते कालो झण्डा गाडी दिउँसो ठिक ३ बजे जिल्लाका मुख्य शहरहरुमा उल्टो शंख फुक्ने कार्यक्रम तय गरेको छ । त्यसपछि कोणसभा गर्ने कार्यक्रम रहेको छ ।

त्यस्तै, संघर्ष समितिले माघ १० गते राष्ट्रिय सभाका लागि मनोनयन दर्ता गर्न आउने जनप्रतिनिधि तथा नेताहरुको स्वागतार्थ ब्यानर राख्ने र अभिनन्दन गर्दै प्रदेशको मुख्य भागमा पर्ने दाङ देउखुरीलाई स्थायी राजधानी बनाउनका लागि ध्यानाकर्षण गराउने निर्णय पनि गरेको छ । संयोजक एमाले दाङका अध्यक्ष टीकाराम खड्काको अध्यक्षतामा बसेको बैठकमा संघर्ष समितिका सहसंयोजक नेपाली कांग्रेसका कीर्तिबहादुर खड्का, सचिव माओवादी केन्द्रका जीवन गौतम, सदस्यहरु एमालेका विकिरण गौतम, कांग्रेसका कमानसिंह भारती, शंकर डाँगी, गिरिराज सुवेदी र एमालेका सुरामणि बेल्बासेको उपस्थिति रहेको थियो ।