प्रधानमन्त्री ओलीलाई भीडभाडमा जान रोक

काठमाडौं । प्रधानमन्त्री केपी शर्मा ओलीलाई भीडभाडमा जान चिकित्सकले रोकेका छन् ।
दसैँमा करिब ६ हजार जनालाई टीका लगाएलगत्तै छातीमा संक्रमण भएर बिरामी परेका प्रधानमन्त्रीलाई पाँच दिन अस्पताल राखिएको थियो ।

अस्पतालपछि लगत्तकै काममा फर्केका प्रधानमन्त्रीलाई चिकित्सकले भीडभाडको कार्यक्रममा जान रोकेका हुन् ।

प्रधानमन्त्री स्वस्थ भैसकेपनि चिकित्सकहरुले स्वास्थ्य अवस्थालाई ध्यानमा राख्दै बाहिरी कार्यक्रममा जान नदिएका हुन् । प्रधानमन्त्रीको स्वास्थ्यमा ध्यान दिन सर्वसाधारणले समेत सामाजिक सञ्जालमा चिकित्सकहरुलाई आग्रह समेत गरेका थिए । अझै केही दिन सतर्कता अपनाउनुपर्ने चिकित्सकहरूको भनाइ छ ।

प्रधानमन्त्री ओली दसैँ–तिहारपछि शुक्रबार पहिलो सार्वजनिक कार्यक्रममा सहभागी हुने अन्तिम तयारीमा थिए । तर, निजी चिकित्सकले अझै कम्तीमा १५ दिन भिडभाडबाट टाढै रहन सुझाव दिएपछि बालुवाटारमै रोकिएका थिए ।

सार्वजनिक कार्यक्रमहरूमा सहभागी नभए पनि प्रधानमन्त्रीको स्वास्थ्य स्थिति भने सामान्य भइसकेको बताइउको छ ।