प्रहरी दिवस रनिङ कप पुरुष भलिबल प्रतियोगिता उद्घाटन

काठमाडौं, २२ असोज
६२ औं प्रहरी दिवस २०७४ को अवसरमा आयोजित प्रहरी दिवस रनिङ कप पुरुष भलिबल प्रतियोगिता राष्ट्रिय प्रहरी प्रशिक्षण प्रतिष्ठान महाराजगञ्जमा आइतबारबाट सुरु भएको छ ।
नेपाल प्रहरी खेलकुद समितिका सदस्य सचिव तथा राष्ट्रिय प्रहरी प्रशिक्षण प्रतिष्ठान महाराजगञ्जका कार्यकारी निर्देशक प्रहरी अतिरिक्त महानिरीक्षक देबेन्द्र सुवेदीले प्रतिष्ठानमा आयोजित एक समारोहबीच रेफ्रीलाई बल हस्तन्तरण गरी प्रतियोगिता उद्घाटन गर्नुभयो ।
प्रहरी अतिरिक्त महानिरीक्षक सुवेदीले भलिबल खेल नेपालमा सुरु भएदेखिनै नेपाल प्रहरीले भलिबल खेलको विकास र विस्तारमा पु¥याएको योगदानको चर्चा गर्दै राष्ट्रियस्तरको प्रतियोगितामा समेत नेपाल प्रहरीका खेलाडीहरुले उत्कृष्ट प्रर्दशन गर्दै आएको बताउनुभयो ।
कार्यक्रममा प्रतियोगिताका संचालक समितिका संयोजक प्रहरी नायव महानिरीक्षक छविलाल जोशीले  खेलकुद प्रतियोगिता सम्बन्धी संक्षिप्त जानकारी दिनुभएको थियो ।
आइतबारबाट सुरु भई असोज २६ गते समापन हुने प्रतियोगितामा प्रहरी प्रधान कार्यालय नक्साल, राष्ट्रिय प्रहरी प्रशिक्षण प्रतिष्ठान महाराजगञ्ज,महानगरीय प्रहरी कार्यालय रानीपोखरी र ७ वटै प्रदेश प्रहरी कार्यालयका टिम  समेत गरी १० टिमको सहभागिता रहेको छ ।
लिग कम नकआउटको आधारमा खेलाईने प्रतियोगितामा लिग चरणमा १२ खेल, सेमीफाइनलमा २ खेल र फाइनलमा १ खेल गरी जम्मा १५ खेल हुनेछन ।