बकर इदमा आपसी सद्भाव र सम्मान बढेर जाने सभामुखको विश्वास

काठमाडौं, ६ भदौ । सभामुख कृष्णबहादुर महराले बकर ईदको उपलक्ष्यमा समस्त मुस्लिम समुदायप्रति शुभकामना व्यक्त गरेका छन् । उनले बकर ईद पर्वले समस्त नेपालीमा आपसी सद्भाव, भातृत्व, त्याग, सेवाभाव र सम्मानको भावना पैदा गर्ने विश्वास लिएको बताएका छन् ।

शुभकामनाको पूर्णपाठ :
त्याग, समर्पण र बलिदानको पर्यायका रुपमा मनाइने मुस्लिम धर्मावलम्बीहरुको महान पर्व बकर ईद (इद ऊल जोहा) को अवसरमा स्वदेश तथा विदेशमा रहेका नेपाली दाजुभाई, दिदीबहिनी एवं विश्वभरका सम्पूर्ण मुस्लिम धर्मावलम्बीहरुमा सुख, शान्ति, समृद्धि र उत्तरोत्तर प्रगतिको हार्दिक शुभकामना व्यक्त गर्दछु ।

इस्लाम पात्रो हिजारी संवतअनुसार नयाँ वर्षको जुल हिज्जा महिनाको १० औं दिनमा मनाइने बकर ईद पर्वले समस्त नेपालीमा आपसी सद्भाव, भातृत्व, त्याग, सेवाभाव र सम्मानको भावना पैदा गर्ने मैले विश्वास लिएको छु । इस्लाम समुदायले यस पर्वको अवसरमा असहाय, गरिब र विपन्न परिवारलाई अनिवार्य रुपमा सहयोग गर्नुपर्ने पद्धति उदाहरणीय छ । यस्ताखाले सेवाभावका कार्यहरु हामी सबैले आत्मसाथ गर्न सके सहिष्णुता, आपसी सद्भाव र भावनात्मक एकता अझ बढेर जानेछ ।

हाम्रोजस्तो बहुजातीय, बहुभाषिक, बहुधार्मिक, बहुसाँस्कृतिक तथा भौगोलिक विविधताले धनी देशमा मनाइने यस्ता पर्वले राष्ट्रिय एकतालाई मजबुत बनाउँदै धार्मिक सहिष्णुता, आपसी मेलमिलाप र सद्भाव कायम गर्न महत्वपूर्ण योगदान पु¥याएका छन् । भाषा, धर्म, परम्परा, रीतिरिवाज, कलासंस्कृति देशको पहिचान, सभ्यता देशको परिचायक हुन् । यी विविधतासहित आपसी सद्भाव, भातृत्वलाई जोगाउँदै धार्मिक सहिष्णुता एवं राष्ट्रिय एकतालाई मजबुत बनाउन यस पर्वले हामी सबैलाई प्रेरणा प्रदान गर्नेछ । फेरि पनि मुस्लिम धर्मावलम्बीहरुको महान पर्व बकर ईदले शान्ति, समृद्धि, त्याग, समर्पणभाव र सत्मार्गमा अगाडि बढ्न सबैलाई प्रेरणा प्रदान गरोस्, यही शुभकामना व्यक्त गर्दछु ।

भदौ ६, २०७५
कृष्णबहादुर महरा