३३ केजी सुन प्रकरण: २६ अभियुक्तको मिसिल झिकाउन आदेश

काठमाडाै, २४ भदाै । उच्च अदालत बिराटनगरले सुन तस्करी र सनम शाक्य हत्या प्रकरणका २६ अभियुक्तको मिसिल झिकाउन आदेश गरेको छ। न्यायाधीश थीरबहादुर कार्की र उमेशकुमार सिंहको इजलासले आइतबार मोरङ जिल्ला अदालतबाट मिसिल झिकाउन आदेश गरेको हो। उच्चले जिल्लाबाट मिसिल आएपछिमात्र सुनवाईको पेसी तोकिने रजिष्ट्रार नारायण रेग्मीले नेपालखबरलाई बताए। उनले अनुसार अदालती प्रक्रिया भएकाले कति समय लाग्ने भन्न नसकिने बताए।

अदालतले संजय बहादुर राउत, दिवेश लोहनी, गोविन्द प्रसाद निरौला विकासराज खनाल, एल बि मगर भन्ने लाल बहादुर मगर, बालकृष्ण श्रेष्ठ, गोपाल कुमार श्रेष्ठ, भुजुङ्ग गुरुङ, प्रजित केसी र दोराम खत्रीको सुरु मिसिल झिकाउन आदेश गरेको हो । यस्तै माधव भन्ने मदन प्रसाद घिमिरे, आर के भन्ने राजेन्द्र कुमार शाक्य, तुलाराम थारु, विरेन्द्रमान श्रेष्ठ, अमर मान डंगोल, श्यामबहादुर खत्री, राजु महर्जन, बालकृष्ण सन्जेल, कपिल राज पुरी, मदन सिलवाल, रामकुमार तिवारी, फाल्दुङ्ग फुल्टुङ्ग भन्ने लक्षुबहादुर गुरुङ, मोहन काफ्ले, कृष्ण भन्ने नरेन्द्र कार्की र लाक्पा शेर्पाको सुरु मिसिल झिकाउन आदेश गरेको हो। यस्तै हाजिरी जमानीमा छोडेका ठाकुरप्रसाद ढुङगाना सञ्चालक रहेको एवल टुर्स एण्ड ट्राभल्स तथा कान्तिपुर होलिडेजको समेत सुरु मिसिल झिकाउन आदेश गरेको हो।

अभियुक्तहरुले पूर्पक्षका लागि थुनामा नराखी साधारण तारेखमा रिहा गरेर मुद्दाको पूर्पक्ष गरिपाउँ भन्दै निवेदन दिएका हुन्। अदालती बन्दोबस्तीको महल १७ अनुसार फौजदारी अभियोगमा जुनसुकै तहको अदालतबाट हुने थुनछेक आदेशमा असहमति भए पक्ष र प्रतिपक्ष पुनरावलोकनका लागि एक तह माथिको अदालतमा निवेदन दिन पाउँने व्यवस्था कानूनमा छ । सुनसरीको झुम्का कारागारसहित मोरङ कारागार र केन्द्रीय कारागारमा बन्दी रहेका उनीहरुले फरक–फरक मितीमा निवेदन दिएका थिए।