बाढीका कारण किसानले न बाली उठाउन पाए न रोप्न, गाउँपालिका अध्यक्ष नै टहरोको बास

राजेन्द्र न्यौपाने

गोरखा ६ साउन । साउन १ गतेका दिन परेको अविरल वर्षाका कारण आएको बाढीका कारण काट्न ठिक्क भएको धान अधिकांश डुवानमा परेको छ । किसानहरुले जिल्लाको लुदीखोला फाँटमा लगाएको जुडी धान थन्क्याउन नपाएका हुन् ।

“साउने संक्रान्ति मानेर २ गते धान काट्न खेताला खोजेको थिएँ”, साउन १ गते आएको बाढीले पाकेको धान लगेको छबिसे फाँटका किसान झकबहादुर अर्यालले बताए । साउने सक्रान्ति मानेर २ गते धान काट्न खेताला खोजेको र काट्ने दिनमा धान खेत बगरमा परिणत भएको उनले बताए ।

खेतमा रहेको माटो समेत नराखी बगाएपछि पुनः रोपाई गर्नसक्ने अवस्था समेत नरहेको अर्का किसान रत्नबहादुर थापा बताउँछन् । २०११ सालपछि ठूलो बाढी यस वर्ष आएको शहीद लखन गाउँपालिका वडा नं. १ का सदस्य समेत रहेका किसान गोविन्दराज खनाल बताउँछन् । लुदी फाँटमा खेत रहेका किसानहरुको चार हजार रोपनी भन्दा बढी खेत बगरमा परिणत भएको उनको भनाई छ ।

गोरखाका लुदीखोलाका फाँट लगायत सिर्दी, भुसुण्डे, अँधेरी, सुकौरा खोलामा भएको बाढीका कारण धेरै धानबाली नष्ट भएको छ । पाकेको धान, रापेको खेत, रोप्न तयार भएका बिउका व्याड सबै बगाएपछि किसानहरु मर्कामा परेका छन् ।

गोरखा सदरमुकाबाट नजिक रहेका फाँटहरुको अवलोकनका लागि प्रदेशका मन्त्रीहरु पुगे पनि दुरदराजका फाँटहरुमा कसैले जानकारीसम्म लिएका छैनन् । शहीद लखन गाउँपालिकाका अध्यक्ष रमेश थापा मगरको बसोबास भएको क्षेत्र रहेको वडा नं. ६ स्थित तीनघर गाउँ नै पहिरोको जोखिममा परेपछि अध्यक्ष थापा सहित गाउँलेहरु नै टहरोको बासमा परेका छन् ।

अध्यक्ष थापाले आफ्नो गाउँपालिकाभित्र के कति क्षति भयो ? तुरुन्त जानकारी दिन वडा अध्यक्षहरुलाई निर्देशन दिएको बताए । वडा अध्यक्षहरुले किसानहरुलाई आफ्नो क्षति विवरण दिन माग गरिसकेको बताएका छन् ।

किसानहरुका धानखेत बगरमा परिणत भएपछि ढुंगा, गिटी, बालुवा तस्कर गर्नेहरु रातभरि खोलामा ट्याक्टर लिएर पुग्ने गरेको स्थानीयहरुले बताएका छन् ।