‘बाढीले ठूलै संकट ल्याएको छ,क्षतिको रिपोर्टका आधारमा योजना बनाउने,गृहमन्त्री शर्मा

लगातारको वर्षापछि आएको बाढीका कारण तराई मधेसका जिल्लाहरुमा ‘कल्पना गरेभन्दा बढी’ नै क्षति भएको एक मन्त्रीले बताएका छन् ।

प्रधानमन्त्री शेरबहादुर देउवा नेतृत्वको सरकारका गृहमन्त्री जनार्दन शर्मा, रक्षामन्त्री भीमसेनदास प्रधानसहित सुरक्षा प्रमुखहरुले सोमबार दिनभर हेलिकोप्टरबाट बाढी प्रभावित क्षेत्रको अवलोकन गरेका छन् । यो टोलीले ठाउँठाउँमा अवतरण गरेर बाढी पीडितहरुको गुनासो समेत सुनेको छ ।

गृहमन्त्री शर्माले भने, ‘कोशीको बाँध फुटेका कारण आएको बाढीले ठूलो क्षति भएको थियो । तर, यो त वषर्ाको पानी मात्र थियो तर, ठूलो क्षति पुर्‍याएको छ ।’

अनुगमनमा खटिएका अधिकारीका अनुसार अहिले पनि धेेरै भूभाग जलमग्न छन् । माथि आकाशबाट हेर्दा घरहरु समुन्द्रमा तैरिएका जहाज जस्तै देखिए ।

रक्षामन्त्री भीमसेनदास प्रधानले भने, ‘हामीले कल्पना गरेभन्दा बढी नै क्षति भएको देखियो ।’गृहमन्त्री शर्माले बाढीबाट भएको क्षति अझ बढ्न सक्ने अनलाइनखबरलाई बताए । ‘क्षतिको जति विवरण आएको छ, यो अझ बढ्छ’ उनले भने, ‘पानी घट्यो भने केही संरचना जस्ताको तस्तै बस्लान् । तर, कतिपय ठाउँमा बगाएका छन् भने कतिपय ठाउँमा पुरिएका छन् ।’

बाढीबाट भएको क्षतिको प्रारम्भिक रिपोर्ट ७ दिनभित्र संकलन गर्ने सरकारको योजना छ ।

क्षतिको रिपोर्टका आधारमा योजना बनाउने भन्दै गृहमन्त्री शर्माले भने, ‘बाढीले ठूलै संकट ल्याएको छ, त्यसअनुसारकै उच्चस्तरको योजना ल्याउनुपर्छ ।’

क्षतिको प्रारम्भिक रिपोर्ट नआउँदासम्म बाढी प्रभावितहरुलाई अस्थायी तर, सुरक्षित स्थानमा सार्ने र राहत सामाग्री वितरण गरिने मन्त्री शर्माले बताए । उनका अनुसार केही स्थानमा सोमबार नै राहत वितरण सुरु भएको छ ।

सरकारले राहत वितरणमा एकद्वार प्रणाली लागू गरेको छ । सहयोग गर्ने संघ संस्थाले सरकारी निकायमा जम्मा गर्नुपर्नेछ, जुन स्थानीय दैवी प्रकोप उद्धार समितिमार्फत प्रभावितहरुसम्म पुर्‍याइने मन्त्री शर्माले बताए ।

स्थानीय निर्वाचन भएका क्षेत्रमा राहत वितरणमा जनप्रतिनिधिहरुलाई पनि खटाइनेछ ।