बिदा हुँदै प्रहरी महानिरीक्षक खनाल, नयाँ महानिरीक्षकको टुंगो आज

काठमाडौं । प्रहरी महानिरीक्षक सर्वेन्द्र खनालले ३० वर्षे सेवा हदका कारण मंगलबार अनिवार्य अवकाश पाउँदै छन् । उनको स्थानमा प्रहरी संगठनको नेतृत्व कसले सम्हाल्ने भन्नेबारे सरकार अझै निर्णयमा पुग्न सकेको छैन ।

सोमबार बसेको मन्त्रिपरिषद् बैठकले नेपाल प्रहरीको महानिरीक्षक नियुक्त गर्न सकेन । यो पटक महानिरीक्षक खनालसँगै उनका ब्याजी तीन अतिरिक्त महानिरीक्षकहरू र १८ प्रहरी नायव महानिरीक्षकले समेत अवकाश पाउँदै छन् । त्यसैले अब प्रहरी संगठनको नेतृत्वमा प्रहरी नायव महानिरीक्षकमध्येबाटै एक जनाले जिम्मेवारी पाउने देखिन्छ ।

प्रहरी नायव महानिरीक्षकत्रय ठाकुर ज्ञवाली, तारिणीप्रसाद लम्साल र सूर्यप्रसाद उपाध्याय महानिरीक्षकका दाबेदार हुन् । कार्यसम्पादन मूल्यांकन र ज्येष्ठतामा ज्ञवाली पहिलो नम्बरमा छन् भने लम्साल दोस्रो र उपाध्याय तेस्रो नम्बरमा छन् । यी तीनै जना महानिरीक्षक खनालका वैकल्पिक ब्याजी हुन् ।

उनीहरू २०४७ असार २५ मा प्रहरी निरीक्षकबाट प्रहरी सेवामा प्रवेश गरेका हुन् । दुईमध्ये जसले प्रहरी संगठनको नेतृत्व सम्हाले पनि आगामी असार २४ गते ३० वर्षे सेवाहदका कारण दुवैले अनिवार्य अवकाश पाउनेछन् । यसअनुसार यी दुईमध्येबाट जो महानिरीक्षक बने पनि पाँच महिनामा कार्यकाल सकिनेछ ।

प्रहरीको नयाँ नेतृत्वले लामो समयदेखि रोकिएको बढुवा प्रक्रियालाई अघि बढाउन पहिलो प्राथमिकता दिनुपर्ने चुनौती छ । प्रहरी संगठनमा लामो समयदेखि बढुवा प्रक्रिया अवरुद्ध हुँदा वृत्ति विकासमा समेत असर परेको अधिकारीहरू बताउँदै आएका छन् ।

स्रोतका अनुसार मंगलबार मन्त्रिपरिषद् बैठक बसेर प्रहरी महानिरीक्षकका सम्बन्धमा टुंगो लगाउनेछ । सोमबार बसेको बैठकमा सामान्य छलफल भए पनि कसलाई महानिरीक्षक बनाउने भन्नेबारे निर्णय नभएको स्रोतले जनायो । ‘मंगलबार बिहान मन्त्रिपरिषद् बैठक बोलाइएको छ,’ स्रोतले भन्यो, ‘प्रहरी महानिरीक्षकका बारेमा निर्णय हुन सक्छ ।’