बेलायती रक्षामन्त्री र प्रचण्डबीच भेटघाट

माओवादी केन्द्रका अध्यक्ष पुष्पकमल दाहाल ‘प्रचण्ड’ र बेलायतका रक्षामन्त्री रक्षामन्त्री मार्क ल्यान्क्यास्टर बीच भेटवार्ता भएको छ । प्रचण्डको नीजि सचिवालयका अनुसार मंगलबार बिहान प्रचण्ड निवास खुमलटारमा भेटघाट भएको हो । भेटका क्रममा रक्षामन्त्री मार्कलेले नेपालको पछिल्लो राजनीतिक परिस्थिति, पार्टी एकता, सुशासन र विकासलगायतका विषयमा जिज्ञासा राखेको बताइएको छ ।

मार्कले नेपालको संविधानले राज्यसंयन्त्रमा महिलाको प्रतिनिधित्वको व्यवस्था गरेपनि त्यसको कार्यान्वयनको पक्षका बारेमा समेत कुराकानी भएको थियो ।

रक्षामन्त्री मार्कका जिज्ञासमाथि प्रतिक्रिया दिँदै प्रचण्डले नेपाली जनताको राजनीतिक स्थिरता र समृद्धिको चाहनालार्इ सम्मान गर्दै नेकपा (एमाले)सँगको एकताको प्रक्रिया अघि बढाइएको माओवादी केन्द्रका अध्यक्ष पुष्पकमल दाहाल प्रचण्ड र बेलायतका रक्षामन्त्री र यो एकताले स्थायित्व, स्थिरता र नेपालको समग्र विकासमा ठूलो भूमिका खेल्ने बताए ।

अध्यक्ष प्रचण्डले नेपालको संविधानले व्यवस्था गरे अनुरुप स्थानीय तह, प्रदेश र संघको निर्वाचनपछि सबै राजनीतिक तहमा ३३ प्रतिशत महिलाहरुको सहभागिता सुनिश्चित भएको समेत जानकारी गराए ।

स्थायित्व र राजनीतिक स्थिरता भए सुशासनको प्रत्याभूति हुने भन्दै उनले बेलायती सरकारले नेपालको शान्ति प्रक्रिया, सुशासन र विकासमा नेपाललाई पुर्याउँदै आएको सहयोगका लागि धन्यवाद दिए ।

भेटका अवसरमा अध्यक्ष प्रचण्डले बेलायती सेनामा रहेका गोर्खा सैनिकहरुको समस्याका बारेमासमेत जिज्ञासा राखेका थिए । रक्षामन्त्री मार्कले बेलायती सेनामा रहेका नेपाली सेनाहरुको समस्याका बारेमा बेलायत सरकार गम्भीर रहेको भनी बताए ।