भवन शिलान्यास

खोटाङ, २२ फागुन , शहीद दिलकाजी, ठूलकुमार स्मृति प्रतिष्ठानको भवन शिलान्यास गरिएको छ ।

दिक्तेल रुपाकोट मझुवागढी नगरपालिका–१ दिक्तेल भवनगैरामा निर्माण गर्न लागिएको भवन मङ्गलबार दिलकाजीकी आमा जयन्तादेवी कार्की, ठूलकुमारकी श्रीमती शान्ता श्रेष्ठ र प्रदेशसभा सदस्य रामकुमार राई ‘पासाङ’ले एकैसाथ शिलान्यास गर्नुभएको हो ।

साविकको नेकपा (माओवादी केन्द्र)को पार्टी कार्यालय रहेको स्थानमा प्रतिष्ठानको नाममा रहेको छ आना जग्गामा भवन बन्ने प्रतिष्ठानका अध्यक्ष सुरेश राईले बताउनुभयो । भवन निर्माणका लागि प्रदेश सरकारबाट रु २० लाख बजेट विनियोजन गरिएको छ ।

तत्कालीन माओवादीका क्षेत्रीय ब्यूरो सदस्य दिलकाजी र उहाँकी श्रीमती इन्दिरा कार्कीलाई २०५९ असार ३१ गते सिम्पानीबाट नेपाली सेनाले गिरफ्तार गरी एकैदिन टुवाखोलामा र जिल्ला सदस्य ठुलकुमार श्रेष्ठलाई पार्टीको कामको सिलसिलामा २०५५ पुस २७ गते उदयपुरको तावाश्रीमा गोली हानी हत्या गरिएको थियो । प्रतिष्ठानले शहीद सप्ताह समापन समारोहको अवसरमा सो भवन शिलान्यास गरेको हो ।

माझीको जिल्ला अधिवेशन शुरु

माझी समुदायको प्रमुख चाड कोशी पूजा तथा प्रथम जिल्ला अधिवेशन लामीडाँडामा शुरु भएको छ । जिल्लाभरका माझी समुदाय लामीडाँडाको रभुँवाघाटस्थित दूधकोशीमा भेला भएर कोशी पूजा गर्दै अधिवेशनमा सहभागी भएका छन् ।

जिल्लाकै सबैभन्दा बढी माझी समुदायको बसोबास रहेको रभुँवाघाटमा मङ्गलबार आयोजित कार्यक्रम प्रतिनिधिसभा सदस्य विशाल भट्टराईले उद्घाटन गर्नुभयो । माझी समुदायको सांस्कृतिक झाँकीसहित आयोजना गरिएको पूजा तथा अधिवेशनमा जिल्ला समन्वय समितिका प्रमुख बबि चाम्लिङ, रावा बेँसी गाउँपालिकाका प्रमुख लिलानाथ निरौला, नेपाली काङ्ग्रेसका युवा नेता सुवासकुमार पोखरेल, पत्रकारलगायतको उपस्थिति थियो ।

अधिवेशनले नयाँ नेतृत्व चयन गर्ने आयोजक समितिका उपाध्यक्ष उमेश माझीले बताउनुभयो । २०६८ सालको जनगणनाअनुसार खोटाङमा ९८० जना माझी समुदाय रहेको तथ्याङ्क छ ।