भारतमा चन्द्रागिरि हिल्सलाई नेपालकै उत्कृष्ट गन्तव्यको पुरस्कार
सारांश
- काठमाडौं, २२ असोज ।
- नेपालको चन्द्रागिरि हिल्स लिमिटेडले नेपालकै उत्कृष्ट पर्यटकीय गन्तव्य पुरस्कार प्राप्त गरेको छ ।
- भारतको राजधानी नयाँदिल्लीमा आयोजना भएको एक विशेष कार्यक्रममा चन्द्रागिरि हिल्सलाई नेपालको उत्कृष्ट पर्यटकीय गन्तव्य पुरस्कार प्रदान गरिएको हो ।
काठमाडौं, २२ असोज । नेपालको चन्द्रागिरि हिल्स लिमिटेडले नेपालकै उत्कृष्ट पर्यटकीय गन्तव्य पुरस्कार प्राप्त गरेको छ । भारतको राजधानी नयाँदिल्लीमा आयोजना भएको एक विशेष कार्यक्रममा चन्द्रागिरि हिल्सलाई नेपालको उत्कृष्ट पर्यटकीय गन्तव्य पुरस्कार प्रदान गरिएको हो ।
नयाँ दिल्लीमा आयोजित १४औँ वार्षिक अन्तर्राष्ट्रिय हस्पिटालिटी तथा ट्राभल अवार्ड कार्यक्रममा भारतका सामाजिक न्याय तथा वातावरण राज्यमन्त्री रामदास अठवाले र पर्यटन राज्यमन्त्री केजे अल्फोनले चन्द्रागिरि हिल्सका अध्यक्ष चन्द्रप्रसाद ढकाललाई सो पुरस्कार प्रदान गरेका हुन् । पुरस्कार वितरण समारोहमा चन्द्रागिरि हिल्स लिमिटेडका महाप्रबन्धक अभिषेकविक्रम शाह र सेल्स विभाग प्रमुख विख्यातविक्रम राणाको सहभागिता रहेको थियो ।
भारत र विश्वका अन्य उत्कृष्ट पर्यटकीय गन्तव्यका साथै सेवा क्षेत्रको पहिचान गरी पुरस्कार प्रदान गरिन्छ । भारतको डिएलके पब्लिकेसन प्रालिले बर्सेनि ‘विश्व इन्डिया एन्ड एक्स्प्लोर हस्पिटालिटी ट्राभल अवार्ड’ वितरण कार्यक्रमको आयोजना गर्ने गरेको छ ।
उक्त पुरस्कारले चन्द्रागिरि हिल्स पछिल्लो समयमा नेपालको मात्र नभएर भारतीय पर्यटकमाझ पनि लोकप्रिय र आकर्षक पर्यटकीय गन्तव्य बनेको डिएलके पब्लिकेसनले जनाएको छ । उक्त कार्यक्रममा भारत र अरू देशका पनि केही उत्कृष्ट गन्तव्य र सेवा क्षेत्रलाई पुरस्कृत गरिएको थियो ।
प्रतिक्रिया