भारतीय चर्चित गायक नर्भिक अस्पताल भर्ना

भारतीय चर्चित प्लेव्याक गायक सोनु निगम काठमाडौँको थापाथलिस्थित नर्भिक अस्पतालमा भर्ना भएका छन् । आफ्नो एक गीतको भिडियोको सुटिङका लागि नेपाल आएका उनी ढाडमा समस्या देखिएपछि नर्भिकमा भर्ना भएका हुन् ।

उनको रगत जाँच र एक्सरे गरिएको र एमआरआई पनि गरिने अस्पताल श्रोतले जनाएको छ । डा। पंकज जलान, डा। प्रवीण नेपाललगायतको टिमले उनको उपचार गरिरहेको छ ।
‘आज उहाँलाई होटल फर्काउने कि अस्पतालमै राख्ने भन्ने कुरा एमआरआईको रिपोर्ट हेरेपछि मात्र थाहा हुन्छ’, अस्पताल स्रोतले भन्यो,‘ तर अहिलेको स्थिति हेर्दा एक रात अस्पतालमै राख्ने सम्भावना देखिएको छ ।’
यसअघि पनि सोनु निगमलाई सी फूडका कारण छालासम्बन्धी एलर्जी भएपछि भारतकै एक अस्पतालमा केही दिन भर्ना गरिएको थियो ।
उनको स्वास्थ्यमा सुधार आएपछि केही दिनअघि उनी पोखराको कार्यक्रममा आएका थिए । उनले भारतीय गीतहरुका साथै नेपाली चलचित्रहरुमा समेत स्वर दिदै आएका छन् ।