निर्वाचन क्षेत्र निर्धारण आयोगद्वारा सुझाव संकलन
सारांश
- विराटनगर, १७ साउन ।
- निर्वाचन क्षेत्र निर्धारण आयोगले आज विराटनगरमा संसदीय क्षेत्र निर्धारणका लागि राजनीतिक दल र सरोकारवालासँग राय सुझाव संकलन गरेको छ ।
- सो अवसरमा उनीहरुले मोरङमा कम्तीमा सातवटा संसदीय निर्वाचन क्षेत्र हुनुपर्ने, जनसङ्ख्या र भूगोलको आधारमा निर्वाचन क्षेत्र निर्धारण हुनुपर्ने तथा आयोगले निष्पक्ष ढंगले क्षेत्र निर्धारण गर्नुपर्नेलगायतका सुझावहरू दिनुभएको थियो ।
विराटनगर, १७ साउन । निर्वाचन क्षेत्र निर्धारण आयोगले आज विराटनगरमा संसदीय क्षेत्र निर्धारणका लागि राजनीतिक दल र सरोकारवालासँग राय सुझाव संकलन गरेको छ ।
सो अवसरमा उनीहरुले मोरङमा कम्तीमा सातवटा संसदीय निर्वाचन क्षेत्र हुनुपर्ने, जनसङ्ख्या र भूगोलको आधारमा निर्वाचन क्षेत्र निर्धारण हुनुपर्ने तथा आयोगले निष्पक्ष ढंगले क्षेत्र निर्धारण गर्नुपर्नेलगायतका सुझावहरू दिनुभएको थियो ।
कार्यक्रममा निर्वाचन क्षेत्र निर्धारण आयोगका सदस्य गणेशराज कार्कीले आयोगले निर्धारित समयसीमाभित्र क्षेत्र निर्धारण कार्य सम्पन्न गर्न अहोरात्र खटिरहेको जानकारी दिनुभयो ।
नेपाली काँग्रेसका केन्द्रीय सदस्य एवम् सांसद शेखर कोइरालाले यो संवैधानिक आयोग भएकाले आयोगको निर्णय निष्पक्ष हुने विश्वास व्यक्त गर्दै मोरङमा कम्तीमा सातवटा निर्वाचन क्षेत्र हुनुपर्ने माग राख्नुभयो ।
नेकपा(एमाले) मोरङका अध्यक्ष विनोद ढकालले क्षेत्र निर्धारण गर्ने क्रममा स्थानीय तह र जातीय समूहलाई प्रभावित नपर्ने गरी कार्य गर्नुपर्ने बताउँदै मोरङमा सातवटा संसदीय क्षेत्र निर्धारण हुनुपर्नेमा जोड दिनुभयो ।
नेकपा(माओवादी केन्द्र)का पोलिटब्यूरो सदस्य गणेश उप्रेतीले जनसङ्ख्या र भुगोलका आधारमा क्षेत्र निर्धारण हुनुपर्ने आवश्यकता औंल्याउनुभयो ।
सङ्घीय समाजवादी फोरम नेपाल मोरङका अध्यक्ष राजकुमार यादवले जनसंख्याको आधारमा क्षेत्र निर्धारण हुनुपर्ने बताउनुभयो ।
नेपाल लोकतान्त्रिक फोरमका जिल्ला अध्यक्ष भक्ति माझीले जातीय समूहका आधारमा क्षेत्र निर्धारण हुनुपर्ने सुझाव दिनुभयो ।
प्रतिक्रिया