मास्कमाण्डु बन्दै काठ्माण्डौ

काठमाडौँमा रहेको धुँवाधुलो र यहाँको राजनीतिको धुलोमैलो हटाउने सवालमा सरकारले नागरिकलाई धेरै उल्लु बनाएको भन्दै विवेकशील नेपाली दलले आज बिहान ८ बजेदेखि “मास्काथोन” (मास्क लगाएर दौड्ने म्याराथन) कार्यक्रम आयोजना गरेको हो । डेढ घण्टासम्म भएको कार्यक्रम नारायण गोपाल चोकदेखि सुरु भई धुम्बाराही, चावहिल, गौशाला हुँदै पिंगलास्थानमा पुगी सम्पन्न भएको थियो ।

कार्यक्रममा स्थानीय, दलका सदस्य तथा शुभेच्छुकहरुको ठूलो सहभागिता रहेको थियो । केही सहभागीहरुले दिवंगत भैसकेका राजा-रानीको भेषमा मास्क लगाई व्यंगात्मक तरिकाले सहभागिता जनाएका थिए l पिंगलास्थानमा पुगेर कोणसभामा परिणत भएको उक्त कार्यक्रममा दलले सहभागी जनाएकाहरुलाई प्रधानमन्त्री, स्वास्थ्य मन्त्री, यातायात मन्त्री तथा स्थानीय विकास मन्त्रीहरुको फोन नम्बर प्रदान गरी एस्.एम्.एस्. गर्न आग्रह गरेका थिए ।

“यहाँको राजनीति तथा वातावरणलाई सफा गर्न तर त्यसबाट आफू प्रभावित नहुनको लागि मास्क लगाएर सहभागी भएका हौं । यस विषयमा आम नागरिकलाई सचेत बनाई आगामी स्थानीय निर्वाचनमा सही नेतृत्व सही ठाउँमा पुर्याउन पहल गर्नु जरुरी रहेको छ ”, कार्यक्रमका संयोजक विकल्प कश्यपले बताए ।

पिंगलास्थानमा भएको कोणसभामा केही समय साँगितिक कार्यक्रम पनि आयोजना गरिएको थियो । कार्यक्रममा सहभागीहरुले कार्यक्रम सञ्चालन गरिएको चौरको सरसफाइ पनि गरेका थिए ।