मोदीको मुखैमा प्रचण्डले गरे बीजेपीका पूर्वसांसद आजादको कडा आलोचना

काठमाडौं, २९ बैशाख । पूर्वप्रधानमन्त्री तथा नेकपा (माओवादी केन्द्र)का अध्यक्ष प्रचण्डले भारतीय जनता पार्टीका पूर्वसांसद कीर्ति आजादको अभिव्यक्तिलाई भारतीय प्रधानमन्त्री नरेन्द्र मोदीकै सामु आलोचना गरेका छन् । दुई दिने नेपाल भ्रमणमा रहेका मोदी र अध्यक्ष प्रचण्डबीच आज भएको भेटवार्तामा उनकै पार्टीका पूर्वसांसद आजादको अभिव्यक्तिप्रति आपत्ति जनाएका हुन् ।

बिजेपीका पूर्व सांसद कीर्ति आजादले दिएको अभिव्यक्ति नेपाल–भारत सम्बन्धको हितका विरुद्ध रहेको भन्दै अध्यक्ष प्रचण्डले त्यसलाई भ्रामक र हानीकारक प्रचारको संज्ञा दिए । उनले पूर्वसांसद आजादको अभिव्यक्तिको भत्र्सना पनि गरे ।

बीजेपीका पूर्वसांसद आजादले आफ्नो ट्वीटर ह्याण्डलबाट प्रधानमन्त्री नरेन्द्र मोदीलाई मेन्सन गर्दै लेखेका थिए, “आदरणीय नरेन्द्र मोदीजी, जनकपुरधाम मिथिलाको राजधानीमा तपाईलाई स्वागत छ । २ सय वर्ष पहिले अंग्रेज र नेपालीबीच भएको सन्धि, जसमा मिथिलाको भागलाई नेपाललाई दिइयो र समाप्त भयो । सीता मातालाई आदर गर्दै यसलाई फिर्ता लिई मिथिला राज्य गठन गर्नुहोस् ।” आजादको यो भनाइलाई नेपालमा व्यापक विरोध गरिएको छ ।

शनिवार दिउँसो होटल हयातमा भएको भेटवार्तामा अध्यक्ष प्रचण्डले सबै क्षेत्रका जनतालाई विश्वासमा लिई तीनवटै तह स्थानीय, प्रदेश र संघीय संसदको निर्वाचन सम्पन्न भएको र यसका लागि भारतले गरेको सहयोगप्रति धन्यवाद दिए । नेपालको समग्र विकासमा छिमेकीहरुबाट सहयोगको अपेक्षा रहेको अध्यक्ष प्रचण्डको भनाई थियो ।

अध्यक्ष प्रचण्डले सिमानाका समस्या, मधेसको डुबानको समस्या र विराटनगरमा रहेको अस्थायी कार्यालय हटाउनु पर्ने कुरा छलफलका क्रममा उठाएका थिए ।

आदरणीय @narendramodi जी, जनकपुर धाम, मिथिला की राजधानी में आपका स्वागत है। दो सौ साल पहले अँग्रेजों और नेपाल क बीच हुई संधि जिसमें मिथिला के भाग को नेपाल को दिया गया समाप्त हो गया है। अनुरोध है इसे वापस लेँ और माँ सीता का आदर करते हुए मिथिला राज्य का गठन करें। @NitishKumar

— Kirti Azad (@KirtiAzaad) May 11, 2018