मोदी आउँदा प्रहरीको निशानामा नेकपा र राष्ट्रवादी मोर्चाका कार्यकता

काठमाडौं, २७ बैशाख । भारतीय प्रधानमन्त्री नरेन्द्र मोदीको नेपाल भ्रमणलाई लिएर सुरक्षा व्यवस्था कडा पारिएको छ । शुक्रबार दुई दिने राजकीय भ्रमणको लागि नेपाल आउन लागेका मोदीको सुरक्षाको लागि व्यापक मात्रामा प्रहरी परिचालन गरिएको प्रहरी प्रधान कार्यालयले जनाएको छ ।

मोदीले भ्रमण गर्ने जनकपुर, काठमाडौं, मुक्तिनाथ लगायतका क्षेत्रहरुमा सुुरक्षा व्यवस्था कडा पारिएको हो । मोदीको सुरक्षाको लागि चारवटै सुरक्षा निकाय परिचालन गरिएको गृहमन्त्रालयका प्रवक्ता रामकृष्ण सुवेदीले जानकारी दिए । नेपाली सेना, नेपाल प्रहरी, सशस्त्र प्रहरी र गुप्तचर विभागका साथै भारतबाट आएका विशेष कमाण्डोले मोदीलाई सुरक्षा प्रदान गर्ने प्रवक्ता सुवेदीले बताए ।

मोदीको सुरक्षा व्यवस्थालाई ध्यानमा राखेर राजधानी लगायतका क्षेत्रमा व्यापक प्रहरी परिचालन गरिएको महानगरीय प्रहरी महाशाखाले जनाएको छ । सामाजिक सञ्जाल फेसबुकमा मोदीको नेपाल भ्रमणलाई लिएर विरोध हुन थालेपछि प्रहरीले नयाँ रणनीति ल्याएको छ ।

प्रहरी स्रोतका अनुसार सामाजिक सञ्जालमा मोदीको विरोध गर्नेलाई ठाउँको ठाउँ पक्राउ गरिनेछ । सामाजिक सञ्जालमा मोदी भ्रमणको चर्को विरोध गर्ने व्यक्तिलाई नियन्त्रणमा लिइने प्रहरीले स्रोत बतायो । त्यस्तै प्रहरीको निशानामा नेपाल कम्युष्टि पार्टी (नेकपा) र राष्ट्रवादी मोर्चा ग्रेटर नेपालका नेता तथा कार्यकर्ताहरु पनि रहेका छन् ।