यातायात व्यवसायीले सरकारलाई समर्थन गर्दै आफै गरे कामकाज बन्द

काठमाडौं, २३ बैशाख । सिण्डिकेट खारेज गर्ने सरकारी निर्णयको विरोध गर्दै यातायात व्यवसायी समितिहरु आन्दोलनमा उत्रेको समयमा सल्यानमा स्थापित “सल्यान–रुकुम यातायात व्यवसायी समिति”ले भने आफ्नो कामकाज आफै बन्द गरेको छ । सरकारी कदमको स्वागत गर्दै उक्त समितिले आफ्नो कामकाज बन्द गरेको हो ।

“नेपाल सरकारको यातायात सेवा सुधारका नयाँ सकारात्मक कामलाई समर्थन गर्दै अर्को निर्णय नहुन्जेल आजकै मितिदेखि समितिका सम्पूर्ण होर्डिङ बोर्ड हटाउने, समितिका व्यवसायी, कर्मचारी पोसाक, परिचयपत्र लगायत अन्य कागजात लगायतका कामकाज प्रयोगमा नल्याउने, टिकट नकाट्ने, गाडी चलानी, टिप शुल्क नलिने निर्णय गरेको छ”, समितिका अध्यक्ष लोकमान बुढाथोकीले भने । उनले सबैलाई एउटै नजरले हेरेर एउटै तराजुमा नतौलिन उनले अनुरोध गरेका छन् ।

सल्यान–रुकुम यातायात व्यवसायी समिति जनताको समिति र सरकारको नीति र विधिअनुसार चल्ने संस्था भएकाले आगामी दिनमा पनि सरकारको नीति र विधिमा नै चल्ने अध्यक्ष बुढाथोकीले बताए । “देशकै नमुना यातायात समितिको रूपमा चिनिएको यस संस्थाले महाभूकम्पमा देशभरिबाटै सबैभन्दा पहिले सल्यानबाट गाडीहरू काठमाडौँ लगेर सल्यानी जनतालाई साबिककै भाडामा सल्यान ल्याएको थियो । त्यो समय मौकाको फाइदा उठाउँदै देशमा लुटतन्त्र चलेको थियो”, अध्यक्ष बुढाथोकीले भने, “भूकम्प पीडितहरूमा निमित्त यातायातको कार्यसमिति, व्यवसायी र कर्मचारीहरू बाट २ लाख ७८ हजार १ सय ९९ उठेको थियो ।”

समितिले सल्यानका एकदमै विकट गाउँ, गाउँका अप्ठ्यारो बाटोमा गाडी सञ्चालन गरेर गाउँका जनतालाई सुविधा दिँदै आएको अध्यक्ष बुढाथोकील जानकारी दिए । तत्कालीन समयमा कसैले यातायात सञ्चालन गर्न सकिन्छ भनेर नसोचेको रुकुम–काठमाडौँ रात्रि बस लगायत नयाँ क्युहरु सञ्चालन गरेको थियो ।”