योमरी पुन्ही आज देशैभरि मनाइँदै

काठमाडौं, ७ पुस । धान्य पूर्णिमा र योमरी पुन्ही आज देशैभरि मनाइँदैछ । नयाँ धान भित्र्त्याएको खुसियालीमा ‘धान्य पूर्णिमा’ मनाउने परम्परा छ ।

यो पर्वमा धानको विशेष महत्व हुन्छ । धानलाई लक्ष्मीका रूपमा पूजा गर्ने परम्परा छ । भकारीमा भरेको धान कम नहोस् र धनधान्यले भरिभराउ होस् भन्ने उद्देश्यले मनाइने भएकाले यो पूर्णिमालाई ‘धान्य पूर्णिमा’ भनिएको हो ।

नेवार समुदायले यो दिनलाई थिन्ला पुन्ही वा योमरी पुन्हीका नामले मनाउने गर्छन् । नेवार समुदायमा विशेष किसिमको तिल, चाकु र खुवा राखेर बनाइएको चामलको परिकार योमरी खाने चलन छ । आज लक्ष्मी, कुवेर, कुमार तथा गणेशको पूजा गरिन्छ ।

यस्तै आजको दिनलाई लिम्बू समुदायले बाली भित्र्याएपछि न्वागी खाने पर्वका रूपमा मनाउने गर्छन् । किराँत समुदायका कतिपय जातजातिमा आजको दिन प्रकृति, पितृ र कुलदेवतालाई पूजा गर्ने परम्परा छ भने सामुहिक रूपमा उधौली पर्व मनाउने गरिन्छ ।