राससकर्मी सुब्बालाई सिर्जनशील पत्रकारिता पुरस्कार

बनियानी, झापा, १६ चैत,  प्रेस स्वतन्त्रता सेनानी एसएल शर्माको स्मृतिमा स्थापित ‘एसएल शर्मा सिर्जनशील पत्रकारिता पुरस्कार’ पत्रकार विष्णु सुब्बालाई प्रदान गरिएको छ ।

नेपाल पत्रकार महासंघको ६३औँ स्थापना दिवसको अवसर पारेर आज बिर्तामोडमा आयोजित एक कार्यक्रममा पत्रकार सुब्बालाई पुरस्कृत गरिएको हो । उहाँलाई प्रदेश नं १ का आन्तरिक मामिला तथा कानूनमन्त्री हिक्मतकुमार कार्कीले रु २१ हजार राशिसहित पुरस्कृत गर्नुभएको हो । यो पुरस्कार २०६० सालदेखि प्रदान गरिँदै आइएको छ ।

झापाको दमकमा रहेर पत्रकारिता गर्दै आउनुभएका पत्रकार सुब्बा राष्ट्रिय समाचार समितिलगायत विभिन्न सञ्चारमाध्यममा आबद्ध भई पत्रकारिता गर्दै आउनुभएको छ ।

त्यसैगरी, सोही अवसरमा ‘पार्वतादेवी प्रोत्साहन पुरस्कार’बाट पत्रकार मुक्ति पौडेलकी पत्नी मेनुका भण्डारी पौडेल पुरस्कृत हुनुभएको छ । सो पुरस्कारको राशि रु ११ हजार रहेको छ । यो पुरस्कार पत्रकारका श्रीमतीलाई २०६५ सालदेखि प्रदान गरिँदै आइएको छ ।