रुपन्देहीका एक उपमहानगरपालिका र पाँच नगरपालिकामा एमालेले लगायो उम्मेद्वारको टुंगो!

रुपन्देही जेठ १५ – रुपेन्देहीमा एमालेले उम्मेद्वारको टुंगो लगाएको छ । १६ वटा स्थानीय तह रहेको रुपन्देहीमा एक उपमहानगरपालिका, पाँच नगरपालिका र १० गाउँपालिका छन् ।

एमालेले उपमहानगरपालिका र नगरपालिकाको मेयर र उपमेयरमा उम्मेद्वारको टुंगो लगाए पनि गाउँपालिकाको अध्यक्ष र उपाध्यक्षमा भने अझै टुंगो लगाउन सकेको छैन ।

एमालेले बुटवल नगरपालिकाको मेयरको उम्मेद्वारमा शिव सुवेदी र उपमेयरको उम्मेद्वारमा गोमा आचार्यको नाम सिफारिस भएको छ । यसैगरी तिलोत्तमा नगरपालिका मेयरको उम्मेद्वार बासु घिमिरे र उपमेयरको उम्मेद्वारमा जागेश्वरी चौधरी रहेका छन् ।

त्यस्तै दवदह नगरपालिकाको मेयरमा टिकाराम चापागाईं र उपमेयरमा विद्या गुरुङ, सिद्धार्थनगर नगरपालिकाको मेयरको उम्मेद्वारमा हरि अधिकारी र उपमेयरमा उमा काफ्ले , सैनामैना नगरपालिकाको मेयरको उम्मेद्वारमा चित्रबहादुर केसी र उपमेयरका उम्मेद्वारमा बिना राना छन् । लुम्बिनी साँस्कृतिक नगरपालिकाको मेयरमा इन्साफ मुसलमान र उपमेयरमा गोमा गुरुङ्ग छनोट भएका छन् ।

कांग्रेस र माओवादी केन्द्रले भने उम्मेद्वारको टुंगो लगाउन सकेका छैनन् । केही ठाउँमा उम्मेद्वार चयन गरेपनि आधिकारिक घोषणा भने भएको छैन । रुपन्देहीका कांग्रेस सभापति अब्दुल रज्जाकले सर्वसहमतिमा उम्मेद्वारको चयन गर्ने प्रयास भइरहेको र केही दिनमा नै सबै तहमा उम्मेद्वारको टुंगो लगाउने बताउनुभयो । तर उम्मेद्वारको टुंगो नलागेपनि कार्यकर्ता भने घरदैलो कार्यक्रममा लागेका छन् ।

बुटवल उपमहानगरपालिकाको १९ वडा मध्ये १७ वडामा कांग्रेसले वडा अध्यक्षको टुंगो लगाइसकेको छ । रुपन्देहीको १६ स्थानीय तहमा १ सय ५५ वडा छन् भने यस जिल्लाबाट ८ सय ४५ जनप्रतिनिधिहरु चुनिने छन् ।