रोकिएको बुढीगण्डकीको मुआब्जा आइतबार वितरण

काठमाडौं,फागुन ५ । बुढीगण्डकी जलविद्युत आयोजनाबाट प्रभावित धादिङ जिल्लाका बासिन्दालाई आइतबार कम्तिमा २० करोड रुपैयाँ वितरण गर्ने तयारीमा ऊर्जा मन्त्रालय जुटेको छ ।

मन्त्रालयअन्तर्गतको बुढीगण्डकी जलविद्युत आयोजना वातावरणीय, पुनस्र्थापना, पुर्नवास तथा मुअब्जा वितरण एकाइको टोली बिहीबारदेखि नै धादिङ जिल्लामा खटिएको छ ।

एकाइ प्रमुख कृष्ण कार्कीले भने, ‘हामी बिहीबारदेखि नै मुआब्जा वितरणको लागि आवश्यक कामका लागि लागिरहेका छौं । शुक्रबार सार्वजनिक बिदा भए पनि जिल्ला प्रशासन कार्यालय धादिङका कर्मचारी, ऊर्जा मन्त्रालय र एकाइका पदाधिकारी सबै फिल्डमा खटिएका छौं । आइतबार दिनभर गरेर २० करोड रुपैयाँभन्दा बढी वितरण गरिसक्ने योजना बनाएका छौं ।’

यसअघि गोरखा र धादिङका प्रमुख जिल्ला अधिकारीले कानुनले मुआब्जा वितरणको काम आफूलाई नदिएको भन्दै काम रोकेका थिए ।

निवर्तमान ऊर्जामन्त्री कमल थापाको समन्वयमा दुवै जिल्लाका प्रमुख जिल्ला अधिकारी, नापी, मालपोत, भूमिसुधारलगायतका निकायका प्रतिनिधिसँग बसेर हाललाई प्रमुख जिल्ला अधिकारीमार्फत नै मुआब्जा वितरणको कार्य गर्न निर्देशन दिएका थिए ।