“वातावरणकर्मीहरुले निर्माणमा भइरहेको प्रगतिलाई रोक्न खोजेका छन्”: मन्त्री अधिकारी

काठमाडाै, ३१ भदाै । संस्कृति पर्यटन तथा नागरिक उड्डयन मन्त्री रविन्द्र अधिकारीले निजगढमा बन्ने अन्तर्राष्ट्रिय विमानस्थल देशको मुहार फर्ने परियोजना भएको बताएका छन्। अब विमानस्थल निर्माण हुने स्थानको विकल्प खोज्न नसकिने भन्दै अधिकारीले जीवनमा कहिल्यै रुख नरोपेकाहरुले आयोजनाको विरोध गरेको दाबी गरे। उनले भने, “केही वातावरणकर्मीहरुले आयोजना निर्माणमा भइरहेको प्रगतिलाई रोक्न खोजेको छन्। यो देश विकासलाई गति दिने आयोजना हो, अब कसैले रोकेर रोकिंदैन। निजगढ विमानस्थल सार्वजनिक निजी साझेदारीमा बन्छ ।“

नागरिक उड्डयन प्राधिकरण (क्यान) मा पत्रकार सम्मेलन गर्दै मन्त्री अधिकारीले दिगो विकासका लक्ष्यलाई आत्मसाथ गर्दै वातावरणमा कम भन्दा कम प्रभाव पारी विमानस्थल निर्माण गरिने बताए। बाराको निजगढमा विमानस्थल बनाउँदा काटिने रुखले पर्यावरणमा असर पर्ने भन्दै आलोचना हुन थालेपछि विमानस्थलका विषयमा जानकारी गराउन उड्डयन क्षेत्रको नियामक निकाय क्यानले पत्रकार सम्मेलन गरेको थियो। क्यानका महानिर्देशक सञ्जीव गौतमले निजगढ विमानस्थल २ हजार ५ सय ९३ हेक्टरमा निर्माण गरिने जानकारी दिए। विमानस्थल बनाउन १ लाख ९४ ‍हजार ४८० ठूला र ५ लाख ७५ हजार २११ साना रुख काटिने जानकारी गराइएको थियो ।

गौतमले सन् २०३५ सम्म विश्वमा ७२१ अर्ब अमेरिकी डलर विमानस्थल बनाउन खर्च हुने अन्तर्राष्ट्रिय नागरिक उड्डयन संस्थाको अध्ययनले देखाएको बताउँदै निजगढ विमानस्थल नेपालका लागि आवश्यकता रहेको दाबी गरे। उनले भने, “निजगढ विमानस्थल एसिया प्यासिफिक क्षेत्रको हबको रुपमा विकास हुने सम्भावना छ । वातावरण जोगाउने विषयमा हामी सचेत छौँ। रुख रोप्ने ठाउँको सुनिश्चितता नभएसम्म रुख काटिदैन।“