विराट गोल्डकप : थ्रीस्टार सेमिफाइनलमा
सारांश
- विराटनगर,चैत २३।
- मनाङ मस्र्याङ्दी क्लबलाई स्तब्ध बनाउँदै थ्रीस्टार क्लब विराट गोल्डकपको सेमिफाइनलमा प्रवेश गरेको छ ।
- विराटनगरस्थित शहीद रंगशालामा बिहीबार भएको अन्तिम क्वार्टरफाइनल खेलमा मनाङको चुनौती २-१ गोलले पन्छाउँदै थ्रीस्टारले अन्तिम चारमा स्थान सुरक्षित गरेको हो ।
विराटनगर, मनाङ मस्र्याङ्दी क्लबलाई स्तब्ध बनाउँदै थ्रीस्टार क्लब विराट गोल्डकपको सेमिफाइनलमा प्रवेश गरेको छ ।
विराटनगरस्थित शहीद रंगशालामा बिहीबार भएको अन्तिम क्वार्टरफाइनल खेलमा मनाङको चुनौती २-१ गोलले पन्छाउँदै थ्रीस्टारले अन्तिम चारमा स्थान सुरक्षित गरेको हो ।
पहिलो हाफसम्म १-० गोलले अगाडि रहेको मनाङलाई अन्तिम समयमा थ्रीस्टारले निराश तुल्यायो । उत्कृष्ट पुनरागमन गर्दै खेलमा फर्किएको थ्रीस्टारको जितमा विमल घर्तीमगर र विदेशी खेलाडी मार्टिनले एकएक गोल गरे
खेलको १९औं मिनेटमा मनाङले अग्रता लिएको थियो । सुवास गुरुङको पासमा विशाल राईले डीबक्स भित्रबाट गरेको प्रहारले जाली चुम्दा थ्रीस्टारका गोलरक्षक एलन न्यौपानेले कुनै मौकै पाएनन् । खेलको ७१औं मिनेटमा विमल घर्तीमगरले पेनाल्टीमा गोल गर्दै थ्रीस्टारलाई खेलमा फर्काएका थिए । मनाङका गोलरक्षक विशाल श्रेष्ठले मार्टिनलाई डीबक्सभित्र ‘ट्याकल’ गरेपछि थ्रीस्टारले पेनाल्टी पाएको थियो । ७५औं मिनेटमा मार्टिनले गोल गर्दै थ्रीस्टारलाई २-१ को अग्रता दिलाएका थिए । विमलको लङ पासमा मार्टिनले हेडमार्फत उत्कृष्ट गोल गरेका थिए ।
दोस्रो हाफमा सुधारिएको प्रदर्शन गरेको थ्रीस्टारले शनिबार हुने दोस्रो सेमिफाइनलमा संकटाको सामना गर्नेछ ।
१० औं मिनेटमा अनन्त तामाङको हेड पोस्टमाथिबाट बाहिरिँदा थ्रीस्टारले अग्रता लिन सकेन । ३७औं मिनेटमा मध्यभागबाट एक्लै बल अघि बढाएका अन्जन विष्टको प्रहार दायाँ बार हुँदै बाहिरिँदा मनाङ दोस्रो गोल गर्नबाट चुक्यो । ५८औं मिनेटमा वान भर्सेस वानमा थ्रीस्टारका मार्टिनको प्रहारलाई मनाङका गोलरक्षक विशाल श्रेष्ठले बचाएका थिए । लगत्तै रुपेश केसीको प्रहार पनि गोलरक्षक श्रेष्ठले विफल पारे । ७८ औं मिनेटमा अन्जनको हेड पोस्टमाथिबाट बाहिरिएको थियो । ८३औं मिनेटमा अन्जनको पासमा विमल रानाको हेड असफल हुँदा मनाङ पाँचौं पटक थ्रीस्टारसँग पराजित हुन पुग्यो ।
तीन महिनायता विराट गोल्डकपसहित मनाङले थ्रीस्टारसँग पाँचौं पटक पराजय भोग्न पुग्यो । गत सोमबार मात्रै मदन भण्डारी गोल्डकपको फाइनलमा मनाङ थ्रीस्टारसँग पराजित भएको थियो । यस्तै इटहरीमा सम्पन्न मदन भण्डारी गोल्डकपमा पनि थ्रीस्टार विजयी बनेको थियो । बुटवलमै सम्पन्न तिलोत्तमा गोल्डकप र चितवनमा सम्पन्न विकास रनिङ सिल्डमा पनि थ्रीस्टारले मनाङलाई पाखा लगाएको थियो ।
थ्रीस्टारका प्रशिक्षक मेघराज केसीले मनाङ र थ्रीस्टारको खेललाई नेपालमा विशेष रुपले हेर्ने गरिएको बताए । उनले मनाङका तुलनामा राम्रो प्रदर्शन गर्न सकेका कारण नतिजा आफ्नो पक्षमा आएको बताए । मनाङका प्रशिक्षक छिरिङ लोप्साङले खेलाडीले राम्रो प्रदर्शन गर्दागर्दै पनि हार बेहोर्नु परेको बताए ।
खेलको म्यान अफ दी म्याच थ्रीस्टारका मार्टिन घोषित भए । उनले १० हजार रुपैयाँ पुरस्कार पाए । शुक्रबार त्रिभुवन आर्मी क्लब र झापा-११ बीच प्रतिस्प्रर्धा हुनेछ ।
प्रतिक्रिया