विश्व प्रेस स्वतन्त्रता दिवस मनाउन सबै शाखाहरुलाई महासंघको आग्रह

काठमाडौं, १६ बैशाख । नेपाल पत्रकार महासंघ केन्द्रीय समितिले यही बैशाख २० गते (मे ३) मा विश्व प्रेस स्वतन्त्रता दिवसलाई विभिन्न कार्यक्रमसहित देशभर मनाउने निर्णय गरेको छ । महासंघ केन्द्रको आयोजनामा उक्त दिन बिहान प्रभातफेरी र दिउँसो अन्तरक्रिया तथा सगरमाथा आरोहणमा सहभागी पत्रकार महिलालाई पुरस्कार प्रदानसहितका कार्यक्रमको आयोजना गरिने महासचिव रमेश विष्टले जारी गरेको विज्ञप्तिमा उल्लेख छ ।

विज्ञप्तिमा महासंघका शाखाहरुले पनि उक्त दिन अन्तरक्रिया एवं विभिन्न रचनात्मक कार्यक्रमहरूको आयोजना गरी विश्व प्रेस स्वतन्त्रता दिवसलाई भव्यरूपमा मनाउन सूचित गरिएको छ । २०७५ वैशाख २० गते महासंघका उपत्यकास्थित तीन जिल्ला शाखा, प्रतिष्ठान शाखा र एसोसिएट संस्थालाई विश्व प्रेस स्वतन्त्रता दिवसका दिन महासंघ केन्द्रले आयोजना गरेको प्रभातफेरी कार्यक्रममा आ–आफ्नो शाखाको व्यानरसहित सबै पदाधिकारी तथा सदस्यहरुको उपस्थितिको व्यवस्था गर्न पनि महासंघले आग्रह गरेको छ ।

प्रभातफेरी कार्यक्रम विहान ६ः४५ बजे काठमाडौंको बबरमहलस्थित सडक विभाग अगाडिबाट सुरु भई बानेश्वरस्थित संघीय संसद् भवनको पश्चिममा पुगी समापन गरिने सबैमा जानकारी गराइएको छ ।

महासंघले विश्व प्रेस स्वतन्त्रता दिवसको अवसरमा आयोजित उक्त कार्यक्रममा सक्रिय सहभागिताका लागि सम्पूर्ण सञ्चारकर्मी, नागरिक समाज, अधिकारकर्मी, कानुन व्यवसायीलगायत आमनागरिकहरुमा हार्दिक आव्हान गरेको छ ।