शहीदका सपना पूरा गर्न निरन्तर क्रान्तिमा अगाडि बढ्न प्रचण्डको आव्हान

काठमाडौं । नेकपा माओवादी केन्द्रका अध्यक्ष पुष्पकमल दाहाल “प्रचण्ड”ले क्रान्ति अझै नसकिएकोले निरन्तर क्रान्तिमा अगाडि बढ्न आव्हान गरेका छन् ।

राष्ट्रिय सभागृहमा जनसाँस्कृतिक महासंघ नेपालले आयोजना गरेको साँस्कृतिक प्रतिरोध दिवस तथा जनसाँस्कृतिक राष्ट्रिय सम्मान–२०७४ लाई सम्बोधन गर्दै अध्यक्ष प्रचण्डले कम्युनिस्ट आन्दोलनले विश्वव्यापी उतारचढावका कारण आफ्ना रणनीतिमा उतारचढाव गरेपनि उद्देश्य र लक्ष्यलाई परिवर्तन नगर्ने बताएका थिए ।

“साँस्कृतिक प्रतिरोध दिवस जनयुद्ध, जनआन्दोलन लगायतमा सहादत प्राप्त गर्ने सहिदप्रति श्रद्धाञ्जलि र घाइते अपाङ्ग कमरेडहरूप्रति सम्मान अर्पण गर्दै नयाँ संकल्प गर्ने दिन हो” अध्यक्ष प्रचण्डले भने, “मुलुकलाई एकताबद्ध गर्दै समाजवादी क्रान्तिको आधार निर्माणको महान अभियानमा समर्पित हुने संकल्प गर्छु ।” जनयुद्धको तयारी, १० वर्षे जनयुद्धको स्तर, जनआन्दोलन, गणतन्त्र, संविधान, संघीयता लगायतका गौरवमय उपलब्धिपछि अब समाजवादी क्रान्तिको अभियानमा रहेको र यसका सैद्धान्तिक, राजनीतिक पक्षको उचाइ निर्माण गर्ने अभियानमा समर्पित हुनुपर्ने उनको धारणा थियो ।

“हामीले समाजवाद, समृद्धि र स्थायित्वको कुरा गर्दा साँस्कृतिक क्रान्तिलाई जीवन्त राख्न नसकिए विचलन आउने छ”, उनले भेन, “ठूलो बलिदान र संघर्षमा सहभागी भएको पिँढी रहँदासम्म त साँस्कृतिक विचलन नआउला, त्यसपछि के होला भन्ने अन्यौल छ ।” साँस्कृतिक क्रान्तिमा जनसाँस्कृतिक महासंघले खेलेको भूमिका प्रशंसनीय रहेको अध्यक्ष प्रचण्डले बताए ।