शान्ता चौधरीले संसदमा गराइन् तुलसीपुर–लमही खण्डमा ठेकेदारको लापर्वाहीको ध्यानाकर्षण

काठमाडौं, २१ साउन । नेपाल कम्युनिष्ट पार्टी (नेकपा)की संसदीय दलका सचेतक शान्ता चौधरीले दाङको तुलसीपुर–घोराही–लमही सडकखण्डमा भइरहेका पुल निर्माणमा ठेकेदारहरुको चरम लापरबाहीले दैनिक सयौं यात्रुहरुले सास्ती भोग्नु परेको भन्दै संसद मार्फत सरकारलाई ध्यानाकर्षण गराएकी छन् । सोमवार संसदमा बोल्दै सांसद चौधरीले सरकारको ध्यानाकर्षण गराएकी हुन् ।

पुल निर्माणमा ठेकेदारहरुको ढिलाइको कारण हिजै ग्वारखोलामा बाढीले बस बगाउँदा २ जना गम्भीर घाइते हुनुपरेको र सयौं यात्रुहरू अलपत्र पर्दै आएको सचेतक चौधरीले बताइन् । पुल निर्माणको लागि बर्षौं बितिसक्दा पनि अझैसम्म ५० प्रतिशत काम नसक्ने ठेकेदारहरुलाई कारवाही गरिनुपर्ने या पुल निर्माणको लागि सम्झौताअनुसार निर्धारित समयमा निर्माण गर्नुपर्ने धारणा उनले राखिन् । नागरिकहरुलाई सहज यात्राको वातावरण बनाइदिन संसदमार्फत चौधरीले सरकारलाई आग्रह पनि गरिन् ।