संविधान संशोधन एमालेलाई मान्य छैन : सचेतक ढकाल

नेकपा (एमाले)का प्रमुख सचेतक भानुभक्त ढकालले सरकारले हिमाल र पहाडलाई टुक्र्याउने गरी ल्याएको संविधान संशोधन एमालेलाई मान्य नहुने बताउनुभएको छ ।

संविधान कार्यान्वयनका लागि नेकपा (एमाले)को चार महिने जनपरिचालन अभियानअन्तर्गत सदरमुकाम म्याङ्लुङमा आज आयोजित सभालाई सम्बोधन गर्दै उहाँले संशोधन प्रस्ताव नेपालको अखण्डता, सार्वभौमसत्ता र स्वतन्त्रतामाथि नै प्रहार हुने प्रकृतिको रहेको आरोप लगाउनुभयो ।

सो अवसरमा ७० वर्षमाथिका ६०० वृद्धवृद्धालाई सम्मान गरिएको थियो । उहाँहरुलाई फूलमाला, अबिर र कदरपत्रले सम्मान गरिएको थियो । सम्मानित हुनेमा २०१५ सालको निर्वाचनमा नेपाली काँग्रेसबाट निर्र्वाचित सांसद तेजमान तुम्बाहाम्फे समेत रहेका छन् । वृद्धवृद्धालाई सचेतक ढकाल र सांसद भवानीप्रसाद खापुङले सम्मान गरेका थिए ।