संसदको अवरोध हटाउन सभामुखसहित शीर्ष नेताको बैठक आज पनि बस्दै

काठमाडौं। संसदको अवरोध हटाउने विषयमा सभामुख देवराज घिमिरेसहित शीर्ष नेताहरूको बैठक आज पनि बस्ने भएको छ ।

अहिले बिहान १० बजे बालुवाटारमा बस्ने तय भएको बैठकमा सभामुख घिमिरेसहित प्रमुख तीन दलका शीर्ष नेताहरु सहभागी हुँदैछन् ।

यसअघि सोमबार बसेको बैठक निष्कर्षविहीन भएपछि आज पुनः बैठक बस्न लागेको हो । हिजो सभामुख घिमिरे, प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवा, नेकपा (एमाले) का अध्यक्ष केपी शर्मा ओली र दलका सचेतकहरूबीच हिजो दुई पटक छलफल भएको थियो ।

पहिलो चरणमा दिउँसो १ बजे सिंहदरबारमा र दोस्रो चरणमा साढे ३ बजेपछि बसेको बैठक निष्पर्कविहीन भएको थियो । सरकार र एमालेबीच सहमति नहुँदा प्रतिनिधिसभाको बैठक आजसम्मका लागि स्थगित भएको थियो ।