सत्तासिन दलसंग सम्बन्ध बिच्छेद गरेको राप्रपाको अबको समिकरण एमालेसँग सुरु भएको संकेत,..

राष्ट्रिय प्रजातन्त्र पार्टीले सरकारमा नजाने घोषणा गर्ने भएको छ । सत्तासिन दल कांग्रेस र माओवादी केन्द्रले अपनामान गरेको निस्कर्षसहित राप्रपाले सरकारमा नजाने घोषणा गर्ने भएको हो । सम्मानजनक सहभागितासहित सरकारमा सहभागि हुने निर्णय गरेको राप्रपालाई सरकारमा नलगेपछि राप्रपा असन्तुष्ट बनेको छ ।

मन्त्रिपरिषद्मा सहभागी हुन बनाएको वार्ता समिति यसअघि नै भंग गरिसकेको छ । वार्ता समिति भंगसँगै राप्रपाले संविधान संशोधनका पक्षमा मतदान गर्ने यसअघिको कार्य सम्पादन समितिको निर्णयमा समेत पुनर्विचार गर्ने तयारी गरेको हो । संविधान संशोधन र सरकारमा सहभागी हुने विषयमा निर्णय गर्ने जिम्मा कार्यसम्पादन समितिलाई दिइसकेको छ ।

अब बस्ने कार्यसम्पादन समितिले सरकारलाई दिएको समर्थन फिर्ता लिदै संशोधनको विपक्षमा उभिने निर्णय गर्ने एक केन्द्रीय सदस्यले दावी गरे । अध्यक्ष कमल थापाकै नेतृत्वमा राप्रपाले पाँच मन्त्रालय सम्हाल्ने गरि तयारी गरिरहेको थियो । नेता वुद्धिमान तामाङले सरकारलाई समर्थन गरिरहनुको औचित्य नरहेकाले राप्रपा नयाँ ढंगले अघि बढ्ने बताए । उनले प्रष्ट नभनेपनि अबको समिकरण एमालेसँग गरेर जानेमा छलफल सुरु भएको संकेत गरे । तामाङले भने संविधान संशोधनमा लचक रहेको प्रतिक्रिया दिए ।