सफल होला त अनमोल र नीतिको जोडी

काठमाडौं । दुई वर्ष अघि एउटा फिल्म ‘एक्स नाईन’ को निर्माण घोषणा गरियो । यो फिल्म अनमोल केसीलाई अनुबन्धित गरियो । अनमोलका नायिकाको रुपमा नीति शाह सो फिल्ममा अनुबन्धित भईन् । फिल्मको तीन महिना अभिनय कार्याशाला पनि गरियो । तर अन्तिममा यो फिल्म बनेन् । अनमोलको नायिका बन्ने नीतिको चाहना पुरा भएन् ।

यिनै मोडल नीति शाह यतिबेला फेरी अभिनेता अनमोल केसीसँग नयाँ फिल्म ‘रावायण’मा जोडिएकी छिन् । चार दिन अघि रावायणमा अनमोल केसी अनुन्धित भएका थिए । बिहिबार यही फिल्ममा अनमोलको नायिकाको रुपमा नीति शाह अनुबन्धित भएकी हुन् ।

नीति शाह ती अभागी कलाकार हुन् । जो यस अघि विभिन्न सिनेमा जोडिएर पनि उनी अनुबन्धित भएको फिल्म निर्माण भएको छैन । उनले एक्स नाईन अघि पनि ‘हुतुतु’ फिल्ममा नायिकाको भूमिकाको लागि सम्झौता गरेकी थिईन् । तर त्यो फिलम बनेन्।

यस्तै नीति शाह गत वर्ष नेपाली ‘कामिनो’मा नीति नायिकाको रुपमा अनुबन्धित भईन् । सो फिल्ममा प्रदीप खड्का नायकको रुपमा अनुबन्धित भए । तर अहिलेसम्म पनि त्यो फिल्मको छायाँकन सुरु हुन सकेको छैन । सो फिल्म कहिले बन्ने भन्ने टुँगो नलागेपछि आफु सो फिल्मबाट बाहिरिएको उनले बताएकी छिन् । उनी यतिबेला अनमोलकसँग फिल्म रावायणमा जोडिएकी हुन् ।

अनमोल यस्ता अभिनेता हुन् । जसले छायाँकन पुरा नगरेसम्म उनको फिल्म आउँछ भनेर विश्वास गर्न सकिन्न । किनकी यसै वर्ष दुईवटा फिल्ममा अनुबन्धित भएर ती फिल्मको छायाँकनमा नगयी अनमोल एक्कासी यो तेश्रो फिल्म रावायणमा जोडिएका हुन् । अनमोलले रावायण खेल्ने भएपछि छायाँकन हुने तयारीमा रहेका दुई फिल्मको निर्माण अलपत्र परेको छ ।

यता आफु रावायणकै लागि मुम्बईबाट काठमाडौं आएको नीतिले बताएकी छिन् । नीतिले आफु यो फिल्ममा सिताको भूमिकामा रहेको पनि खुलाएकी छिन् । यो फिल्ममा अनमोल भने दोहोरो भूमिकामा प्रस्तुत हुने भएका छन् ।

फिल्मलाई सुदर्शन थापाले निर्देशन गर्दैछन् । फिल्मको निर्मातामा सुदर्शन पत्नी सुप्रिया कुटवाल छिन् । सुप्रियाले अनमोल र नीतिसँग सम्झौता गरिएको तस्बिर बिहिबार सामाजिक सञ्जालबाट शेयर गर्दै यो फिल्मको निर्माण तयारी तिव्रगतिमा भईरहेको बताएकी हुन् ।