सभामुख महराले यस्तो देखेका रहेछन् अनलाइन मिडियाको चुनौति

काठमाडौं, १५ जेठ । सभामुख कृष्णबहादुर महराले पत्रकारिताको मिसन देश, जनता र समृद्धि हुनुपर्ने बताएका छन् । बुद्धभूमि मिडिया प्रा.लि.ले शुरु गरेको रिपोर्टनेपाल डटकमको आज (मंगलबार) उद्घाटन गर्दै सभामुख महराले बताएका हुन् ।

“पत्रकारिताको आ–आफ्नै मिसन हुन्छ”, सभामुख महराले भने, “साँचो अर्थमा पत्रकारिता गर्ने हो भने तपाईंहरुले देश र जनतालाई नबिर्सिनुस् । त्यसमै देशको मिसन पूरा हुन्छ । अबको पत्रकारिताको मिसन पनि देश, जनता र समृद्धि नै हुनुपर्दछ ।”

अहिले अनलाइन मिडियाको मुख्य चुनौती विश्वसनीयता स्थापित गर्नु रहेको भन्दै सभामुख महराले मिडियाको विश्वसनीयता कति सत्य, तथ्य र निष्पक्ष हुन्छ, त्यसले नै निर्धारण गर्ने बताए । “तपाईंहरु कति सत्य, तथ्य र निष्पक्ष हुनुहुन्छ, त्यसले नै तपाईंहरुको विश्वसनीयता निर्धारण गर्छ”, उनले भने, निष्पक्ष भएर पत्रकारिता गर्नुभयो भने विश्वासिलो र मर्यादित हुनुहुन्छ ।”

आफूले १० वर्षअघि सञ्चारमन्त्री रहँदा पत्रकारिता क्षेत्रसँग नजिक रहेर काम गरेको चर्चा गर्दै सभामुख महराले नेपाली पत्रकारिताका चुनौती र अप्ठ्याराहरुसँग परिचित रहेको बताए । पछिल्लो समय मिडियाको संख्या निकै बढेको भन्दै उनले अनलाइन मिडियाहरु झनै छ्यापछ्याप्ती भएकोले भीडको बीचमा आफ्नै छुट्टै पहिचान बनाउन रिपोर्टनेपाललाई आग्रह गरे ।

सभामुख महराका प्रेस सल्लाहकार डिल्ली मल्लका अनुसार गणतन्त्र दिवसकै दिन शुरु भएको अनलाइन मिडियाले गणतन्त्रको संस्थागत विकास गर्ने देशको मिसनलाई पूरा गर्न पनि सभामुख महराले आग्रह गरेका थिए । विगतमा राष्ट्रियता बिनाको लोकतन्त्र र लोकतन्त्र बिनाको राष्ट्रियता रहेको चर्चा गर्दै सभामुख महराले अहिले लोकतान्त्रिक गणतन्त्रमा राष्ट्रियता र लोकतन्त्र सँगसँगै रहेको बताए ।

“विगतमा राष्ट्रियता थियो, लोकतन्त्र थिएन । लोकतन्त्र थियो राष्ट्रियता थिएन, केन्द्रमा राजा–महाराजा र अमूक शक्ति थियो, उनले भने, “अहिले हामीले लोकतान्त्रिक गणतन्त्र प्राप्त गरेका छौं, लोकतन्त्र र राष्ट्रियताको केन्द्र नेपाली जनता बनेका छन् ।” लोकतान्त्रिक गणतन्त्रका निम्ति ठूलो संघर्ष र बलिदान भएको चर्चा गर्दै महराले जनताको शक्तिले मात्रै परिवर्तन सम्भव भएको बताए ।