सम्बन्ध सुधार्दै पारस शाह

काठमाडौँ, पुस ११ । झन्डै तीन वर्षअघि नेपाल फर्किए पनि पूर्व युवराज पारस शाहले निर्मल निवासमा अझै औपचारिक प्रवेश पाएका छैनन् । यद्यपी, पछिल्ला दिनमा उनले पत्नी हिमानीसहित परिवारका सदस्यसँगको सम्बन्धमा भने सुधार गर्दै छन् । आफ्ना उद्दण्ड गतिविधि र अनियन्त्रित खानपिनमा पनि उनले नियन्त्रण गरेका छन् । यो खबर योगेश ढकालले आजको गज्जब साप्ताहिकमा लेखेका छन् ।

२०७१ चैतमा बैंककबाटछ फर्किएपछि पारस बहिनी शीताष्मा (काका धिरेन्द्रकी छोरी) को घरमा बस्दै आएका छन् । पिता पूर्वराजा ज्ञानेन्द्र, आमा कोमल र पत्नी हिमानीसहित परिवारका सदस्यसँगको उनको भेटघाट कमै हुने गरेको थियो । तर पछिल्लो एक वर्ष यता बाबु आमा र श्रीमतीसँगको भेटघाट भने बाक्लो भएको छ ।

पारस १५ असोजमा पत्नी हिमानीको जन्मदिनमा सहभागी भए। परिवारका नजिकका आफन्तबीच मनाइएको उक्त कार्यक्रममा पारस र हिमानी केहीबेर सँगै नाँचेका पनि थिए । उनीहरूलाई सँगै नाच्न नातेदारहरूले मिलाइदिएका थिए । दसै तिहार बुबा आमासहित परिवारसाग निर्मल निवासमै रमाइलो गरेर मनाए ।