भ्रमपूर्ण दाबीले चर्चामा अशोक दर्जी, भिडियोको सत्यता अपुष्ट

सडकमा भइरहेको एउटा झगडाको भिडियोलाई लिएर सामाजिक सञ्जालमा चर्चित बालकलाकार तथा गायक अशोक दर्जीमाथि दुर्व्यवहार भएको दाबीसहित फैलाइएको सामग्रीको सत्यतामाथि गम्भीर प्रश्न उठेको छ। सामाजिक सञ्जालमा भाइरल भइरहेको उक्त भिडियोका कारण उनका  शुभचिन्तकहरू चिन्तित बनेका छन्।

उक्त सार्वजनिक दृश्यमा केही व्यक्तिहरूले एक किशोरलाई घेरेर आर्थिक लेनदेनको विषय उठाउँदै दुर्व्यवहार गरिरहेको देखिन्छ। सोही दृश्यलाई अशोक दर्जीको नामसँग जोडेर सामाजिक सञ्जाल प्रयोगकर्ताहरूले अनधिकृत रूपमा व्यापक सेयर र टिकाटिप्पणी गरिरहेका छन्।

पछिल्लो समय पढाइसँगै चलचित्र ‘पार्वती’ मार्फत अभिनय यात्रामा जोडिएका गायक दर्जीको प्रतिष्ठामा आँच पुग्ने गरी यो सामग्री फैलाइएको हो। हाल कक्षा ११ मा अध्ययनरत यी उदयमान कलाकारका विषयमा फैलाइएको सो घटना कहिले र कहाँ भएको हो भन्ने पुष्टि भएको छैन।

यस घटनाबारे दर्जीको परिवार तथा कुनै पनि आधिकारिक निकायले भिडियोको सत्यता पुष्टि गरेका छैनन्।

त्यसैले, सामाजिक सञ्जालमा भ्युज र सङ्ख्या बढाउने उद्देश्यले विनाप्रमाण फैलाइएका यस्ता संवेदनशील र भ्रमपूर्ण दाबीहरूको पछि नलाग्न र वास्तविक तथ्य बाहिर नआउन्जेल डिजिटल प्लेटफर्ममा आउने अपुष्ट हल्लाहरूमा विश्वास नगर्न सरोकारवालाहरूले आग्रह गरेका छन्।