सलह पक्रेर ल्याउनुस् किलोको २० रुपैयाँ लैजानुस्

नेपालमा सलह कीरा प्रवेश गरेसँगै यसबाट बालीनाली कसरी बचाउने भन्ने चिन्ता थपिएको छ । यसै चिन्ताकै बीच प्रदेश ५ सरकारले सलह किरा समातेर ल्याउनेलाई नगद दिने निर्णय गरेको छ । शनिबार प्रदेश ५ मा सलह कीरा देखिएपछि प्रदेश सरकारले एक किलोग्राम सलह ल्याउनेलाई २० रुपैयाँ दिने निर्णय गरेको छ ।

सलहले पु¥याउन सक्ने क्षति कम गर्न विभिन्न उपायमध्ये संकलन गरेर स्थानीय तहका वडा कार्यालयमा बुझाउनेलाई एक किलोग्रामको २० रुपैयाँका दरले नगद दिन लागिएको भूमि व्यवस्था, कृषि तथा सहकारी मन्त्रालयका सचिव तेजबहादुर वलीले बताए । सलह जम्मा गरेर ल्याउनेलाई वडा कार्यालयमै तत्कालै पैसा दिइने व्यवस्था मिलाइएको उनको भनाई छ ।

सलह दिउँसो उड्ने र साँझमा बास बस्ने गर्छ । त्यसैले बास बसेका बेला समातेर जम्मा गरे क्षति कम हुने आँकलन मन्त्रालयले गरेको छ । त्यसैले सलह समात्नेलाई प्रोत्साहन स्वरुप रकम लिन मन्त्रालयले आग्रह गरेको हो । मालाथिन र क्लोरपाइरिफोस विषादी पानीमा मिसाएर छर्केर पनि सलह नष्ट गर्न सकिने मन्त्रालयले जनाएको छ । ३ मिलिलिटर मालाथिनमा एक लिटर पानी र २ मिलिलिटर क्लोरपाइरिफोसमा एक लिटर पानी मिसाउन सकिने मन्त्रालयले जानकारी दिएको छ ।

मन्त्रालयले धानको बीउलाई सुरक्षित गर्न त्रिपाल वा प्लास्टिकले ढाकेर राख्न पनि अनुरोध गरेको छ । करोडौको झुण्डमा हिड्ने सलहले एक रातमै ३५ हजारलाई पुग्ने बालीनाली नष्ट गर्ने अनुसन्धानले देखाएको छ ।