सल्यानको कालिमाटी गाउँपालिकाको कुनै वडामा छैन बिजुली

सल्यान, १७ पुस । सल्यानको कालिमाटी गाउँपालिकामा कुनै पनि वडालाई बिजुली बत्तीले छोएको छैन । बिजुली बत्ती नभएपछि अरु काम त परैको कुरा, सिंगो गाउँपालिकाबासी अन्धकारमा बस्न बाध्य भएका छन् ।

सातवटा वडा रहेको कालिमाटीमा बिजुली वत्तीको पहुँच नपुग्दा स्थानीयहरु धेरै कुरामा पछाडि परेका छन् । विद्युत अभावमा गाउँपालिकाका कामकारवाहीहरु झनै प्रभावित देखिएका छन् ।

स्थानीय सरकारको रुपमा रहेको गाउँपालिका कार्यालयले नागरिकलाई सेवा प्रवाह गर्दा विद्युत अभावमा प्रभावकारी हुन नसकेको पाइएको छ भने दैनिक कार्य सम्पादनमा समेत बाधा पुग्ने गरेको छ । कालिमाटी गाउँपालिकाका अध्यक्ष दानबहादुर केसीले बिजुली बत्ती नहुँदा उत्पन्न हुने समस्या आफूहरुले झेल्नुपरिरहेको बताए ।

उनले भने “बिजुली नहुँदा कार्यालयमा सञ्चालन हुने हरेक काममा समस्या उत्पन्न हुने गरेको छ । विद्युत अभावकै कारण हाम्रो गाउँपालिका टेलिफोन, इन्टरनेट तथा बैंक सेवाबाट वञ्चित हुनुपरेको छ ।” कतिपयले वैकल्पिक उर्जाको रुपमा सोलार जोडेको भएपनि अझै स्थानीयहरु टुकी बालेर अँध्यारो हटाउनुपर्ने बाध्यतामा रहेको गाउँपालिकाका उपाध्यक्ष सहनशीलता ओलीले बताइन् ।

“गाउँपालिकाबासीलाई कुटान, पिसानदेखि मोबाइल चार्ज गर्न समेत समस्या छ”, ओलीले भनिन्, “गाउँपालिकाको कार्यालयमा पनि कर्मचारीहरुले बिजुली अभावमा काम गर्न कठिनाई हुने गरेको सुनाइरहन्छन् ।”